सञ्चारिका समूह नेपालले राष्ट्रपति रामचन्द्र पौडेललाई आफ्नो १० बुँदे मागपत्र बुझाएको छ । सञ्चारिका समूहकी अध्यक्ष विमला तुम्खेवा नेतृत्वको एक टोलीले राष्ट्रपति पौडेललाई शीतलनिवासमा भेटी पत्रकार महिलाका साझा मुद्दा समेटिएको मागपत्र पेस गरेको केन्द्रीय सदस्य साजना तामाङले जानकारी दिइन् ।
राष्ट्रपतिलाई बुझाइएको मागपत्रमा मिडियामा लैंगिक समानता तथा सामाजिक समावेशीकरण हुनुपर्ने विषयलाई जोड दिइएको छ । सञ्चारिकाको मागपत्र बुझिसकेपछि राष्ट्रपति पौडेलले भने, ‘सञ्चारिका समूहको नाम मैले निकै सुनिरहेको हो । तपाईँहरूले जिम्मेवार भएर राम्रो काम गरिरहनुभएको छ । कार्यकारी भूमिकामा नभए पनि तपाईँहरूको मुद्दालाई प्राथमिकतामा राखेर काम गर्न ताकेता गर्नेछु । भेट्न आउनुभयो, धन्यवाद ।’
सञ्चारिका समूह २०५२ सालमा स्थापना भएको देशभरका पत्रकार महिलाको साझा संस्था हो । ७ प्रदेश र २७ वटा जिल्लामा यसका शाखाहरु रहेका छन् ।
सञ्चारिकाको मागहरु
१. सञ्चार माध्यममा लैंगिकमैत्री वातावरण स्थापना गरियोस् ।
२. समान कामको समान ज्याला निर्धारण गरियोस् ।
३. पत्रकार महिलाको क्षमता अभिवृद्धिका लागि आवश्यक तालिमको व्यवस्था गरियोस् ।
४. पत्रकार महिलाको सञ्चार माध्यमबाट पलायन हुने क्रम रोक्न, पेसागत रूपमा स्थायित्व हुने गरी रोजगारीको सुनिश्चितता गरियोस् ।
५. सरकारी नियुक्तिहरूमा पत्रकार महिलालाई प्राथमिकता दिइयोस् ।
६. पत्रकारितामा आउन चाहने नयाँ पुस्ताका महिलालाई प्रोत्साहन गर्नका लागि उत्साहजनक वातावरणको सृजना गरियोस् ।
७. कार्यस्थलमा हुने हिंसा तथा समाचार लेखेवापत आउने धम्की तथा हुन सक्ने जोखिम व्यवस्थापनका लागि उजुरी गर्ने संयन्त्र र कारवाही गर्ने निकाय खडा गरियोस् ।
८. पत्रकार महिलाका विशेष अवस्थाहरू ९जस्तैः गर्भवती, सुत्केरी० लाई सम्बोधन गर्दै तलबी बिदाको व्यवस्था गरियोस् ।
९. समाचार संकलन तथा सम्प्रेषणका क्रममा हुन सक्ने दुर्घटनाहरूमा पत्रकार महिलालाई सहज उपचारका लागि स्वास्थ्य बिमाको व्यवस्था गरियोस् ।
१०. मिडिया हाउसहरुमा पत्रकार महिलाको करार नियुक्तिको अवधि छोट्याई यसको अनुगमन गरियोस् ।
