पृथ्वी राजमार्गअन्तर्गत धादिङको बैरेनीमा तीन वटा गाडी ठोक्किँदा ३७ जना घाइते भएका छन् । गल्छी गाउँपालिका-६, बैरेनीमा गएराति रोकिराखेको बा ०३-००१-००६ ख २०५६ नम्बरको ट्रकलाई काठमाडौंबाट बाग्लुङका लागि छुटेको बा ०१-००६ ख ७४९९ नम्बरको बसले पछाडिबाट ठक्कर दिएको थियो ।
लगत्तै काठमाडौंबाट वीरगञ्जका लागि छुटेको अर्को बस बा ०१-००६ ख ६७१६ ले बाग्लुङका लागि छुटेको बसलाई पछाडिबाट ठक्कर दिएको थियो । दुर्घटनामा घाइते भएकालाई राति नै उद्धार गरी अस्पताल पठाएको इलाका प्रहरी कार्यालय गजुरीले जनाएको छ ।
घाइतेमध्ये ३४ जनाको काठमाडौं ट्रमा सेन्टर, शिक्षण अस्पतालसहित विभिन्न अस्पतालमा उपचार भैरहेको छ । घाइतेमध्ये केहीको अवस्था गम्भीर छ । तीन जना उपचारपछि डिस्चार्ज भएका छन् । तीनवटै गाडीका चालकलाई इलाका प्रहरी कार्यालय गजुरीले नियन्त्रणमा लिएको छ ।
