अन्तरिम सरकारको प्रधानमन्त्रीमा नियुक्त भएकी पूर्वप्रधानन्यायाधीश सुशीला कार्कीले पद तथा गोपनीयताको शपथ लिएकी छन् । शुक्रबार बेलुकी (भदौ २७) शीतलनिवासमा आयोजित कार्यक्रममा कार्कीले राष्ट्रपति रामचन्द्र पौडेलबाट पद तथा गोपनीयताको शपथ लिएकी हुन् ।
यसअघि, संविधानको धारा ६१ अनुसार राष्ट्रपति पौडेलले कार्कीलाई प्रधानमन्त्री पदमा नियुक्त गरेका थिए । कार्की नेपालको पहिलो महिला प्रधानमन्त्री बनेकी हुन् । शपथग्रहण समारोहमा उपराष्ट्रपति रामसहायप्रसाद यादव, प्रधानन्यायाधीश प्रकाशमानसिंह राउत, विदेशी कुटनीतिक नियोगका प्रमुख एवं प्रतिनिधि लगायतको उपस्थिति रहेको थियो ।
पूर्वप्रधानमन्त्री बाबुराम भट्टराई पनि सो अवसरमा उपस्थित थिए । तर, बाँकी पूर्वप्रधानमन्त्री र निवर्तमान मन्त्रिमण्डलका सदस्यहरु भने सपथ ग्रहण समारोहमा उपस्थित थिएनन् । त्यस्तै, सभामुख देवराज घिमिरे र राष्ट्रियसभा अध्यक्ष नारायण दाहाल पनि अनुपस्थित भएका छन् ।
