सरकारले मुलुककै पहिलो नागढुंगा सुरुङमार्गको उपभोग दस्तुर रकम तोकेको छ । यही साउन २६ गते बसेको मन्त्रिपरिषद् बैठकले सुरुङमार्गको उपभोग दस्तुर तोकेको हो ।
कार र भ्यान काठमाडौं आउँदा प्रत्येकपटक ६५ र बाहिर जाँदा ६० रुपैयाँ दस्तुर तोकिएको छ । मिनिबस र ट्रक काठमाडौं आउँदा ११५ र जाँदा ८० रुपैयाँ तोकिएको छ । ठूला बस र ट्रक काठमाडौं आउँदा २६० र जाँदा २०० रुपैयाँ दस्तुर निर्धारण गरिएको सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले जानकारी दिए । मन्त्री गुरुङका अनुसार, भारी उपकरण काठमाडौं ल्याउँदा ६०० र लैजाँदा २५० रुपैयाँ तोकिएको छ । सुरुङमार्गबाट मोटरसाइकल चलाउन नपाइने व्यवस्था गरिएको छ ।
सुरुङ निर्माणको काम अन्तिम चरणमा पुगेको छ । ढिलोमा एक वर्षभित्र सुरुङमार्ग सञ्चालनमा ल्याइने उनले बताए । सुरुङमार्ग ०७६ कात्तिक ४ गतेदेखि निर्माण थालिएको थियो । ०८० वैशाखसम्म सम्पन्न गर्नुपर्ने सम्झौता थियो । तर, कोरोना तथा स्थानीयको अवरोधका कारण म्याद थपिएको थियो ।
सुरुङमार्ग दुई हजार ६८८ मिटर लामो छ । सिस्ने खोलाबाट नागढुंगा सडक हुँदै बलम्बुसम्म आइपुग्न औसत ३३ मिनेट बढी लाग्ने गरेको छ । मुख्यसँगै आपत्कालीन सुरुङ समेत निर्माण गरिँदै छ । आपत्कालीन सुरुङको दूरी दुई हजार ५५७ मिटर रहेको आयोजनाले जनाएको छ ।
जापान अन्तर्राष्ट्रिय सहयोग नियोग (जाइका)को सहयोगमा सुरुङ निर्माण गरिएको हो । सुरुङमार्ग निर्माणको जिम्मा जापानी कम्पनी हाज्मा एन्डो कर्पोरेसनले पाएको थियो । सुरूङमार्ग निर्माण गर्न जापान सरकारको १६ अर्ब सहुलियतपूर्ण ऋण र सरकारको ६ अर्ब रुपैयाँ लगानी छ ।
