यो वर्ष ६० हजारभन्दा बढी लाई डेंगु संक्रमण हुन सक्ने प्रक्षेपण इपिडिमियोलोजी तथा रोग नियन्त्रण महाशाखाले गरेको छ । महाशाखाले डेंगु प्रकोपबाट ६० हजारभन्दा बढी बिरामी हुनसक्ने अनुमान गर्दै त्यसअनुसारको कार्ययोजना तयारी समेत गरिसकेको दाबी गरेको छ ।
डेंगु फैलने समय आएकोले जति बेला पनि जुनसुकै ठाउँमा डेंगु सङ्क्रमण तीव्र गतिमा फैलिने सक्ने हुँदा सचेत रहन किटजन्य रोग नियन्त्रण शाखाका प्रमुख डा. गोकर्ण दाहालको सुझाव छ । साउनदेखि कात्तिक अन्तिमसम्म अत्यधिक मात्रामा डेंगु संक्रमण बढ्ने उच्च जोखिम रहेको उनले बताए । उनका अनुसार हालसम्म ७३ जिल्लाबाट १६ सयको हारहारीमा डेंगु संक्रमण पुष्टि भएको छ । ४० देखि ८० प्रतिशत बिरामी उपचारको दायरामा नआउने उनी बताउँछन् ।
उनका अनुसार तथ्यांकमा डेंगु संक्रमण कम देखिएको छ तर १० हजारभन्दा बढी बिरामी उपचारको दायरामा आएका छैनन् । ‘संक्रमण फैलिने सम्भावना उच्च छ । डेंगु बढ्ने अनुमानका साथ कार्ययोजना तथा प्रदेशसँग समन्वय गरी डेंगु नियन्त्रण गर्ने तयारी गरिएको छ । यो आर्थिक वर्षका लागि डेंगु नियन्त्रण गर्न करिब १० करोड बजेट विनियोजन छ,’ उनले भने ।
बढी संक्रमित बागमतीमा, सातामै ७१ जना थपिए
महाशाखाका अनुसार हालसम्म कुल १ हजार ६ सय ७३ जनामा डेंगु संक्रमण पुष्टि भएको छ । पछिल्लो एक सातामा मात्रै ७१ जना नयाँ संक्रमित थपिएका छन् । गण्डकी प्रदेशमा सबैभन्दा धेरै २० जना नयाँ संक्रमित भेटिएका छन् भने कर्णालीमा सबैभन्दा कम १ जना मात्र पुष्टि भएका छन् । बागमती प्रदेशमा ४०४ जना, गण्डकीमा ३५८ जना, कोसी प्रदेशमा ३३४, लुम्बिनी प्रदेशमा २७८, सुदूरपश्चिममा २३२, कर्णालीमा ३६, मधेस प्रदेशमा ३१ जना संक्रमित रहेका छन् ।
गत वर्ष ५० हजारमा संक्रमण, १५ को मृत्यु
ईपिडिमियोलोजी तथा रोग नियन्त्रण महाशाखा (ईडिसिडी)को तथ्याङ्क अनुसार गत वर्ष ४५ हजार भन्दा बढीलाई डेंगु संक्रमण भएको थियो । संक्रमणबाट हालसम्म १५ जनाले ज्यान गुमाएका थिए ।
