चर्चित सामाजिक सञ्जाल टिकटकले पनि माइक्रोब्लगिङ सुविधा सुरु गरेको छ । आफ्नो भिडियो स्ट्रिमिङ सुविधाका लागि चर्चित टिकटकले पछिल्लो अपडेटअनुसार प्रयोगकर्तालाई तस्बिर, शब्दहरू वा भिडियो पोस्टमध्ये के पोस्ट गर्ने भनेर छान्नमिल्ने सुविधा दिनेछ । जुलाई महिनाकै सुरुवातमा चिनियाँ कम्पनी बाइटडान्सको स्वामित्वको कम्पनीले केही देशमा स्पटिफाइ र एप्पल म्युजिकको प्रतिस्पर्धी प्लाटफर्म टिकटक म्युजिक पनि सार्वजनिक गरेको थियो ।
माइक्रोब्लगिङ अर्थात भिडियो वा तस्बिरबिना शब्द वा वाक्य मात्रै पनि पोस्ट गर्न मिल्नेमा कसलाई उछिन्ने भनेर ट्विटर र नयाँ थ्रेड्सबीच प्रतिस्पर्धा चलिरहँदा अब उनीबिच टिकटक पनि थपिएको छ ।
अहिले एक्स बन्ने क्रममा रहेको ट्विटरमा विश्वकै धनाढ्य मालिक इलन मस्कले एकपछि अर्को परिवर्तन गर्न थालेपछि सामाजिक सञ्जाल क्षेत्रका विभिन्न ठूला कम्पनीहरू ट्विटरका परम्परागत प्रयोगकर्तालाई आफूतर्फ तान्ने प्रयासमा जुटेका छन् । मस्कले दैनिक पढ्न मिल्ने ट्विटको कोटा तोकेकै साता मेटाले प्रतिस्पर्धी थ्रेड्स् एप सार्वजनिक मात्रै गरेन, केही दिनमै दस करोड प्रयोगकर्तासमेत जुटायो ।
सोमबार मस्कले ट्विटरको नयाँ लोगो र पुनर्संरचनाको घोषणा गरेसँगै टिकटक पनि एक विज्ञप्तिमार्फत् माइक्रोब्लगिङका प्रयोगकर्ता आकर्षित गर्ने दौडमा सामेल भएको हो । कतिपय ठूला देशमा प्रतिबन्ध र कानुनी समस्याको सामना गरिरहे पनि टिकटकका एक अर्बभन्दा बढी प्रयोगकर्ता छन् । तीमध्ये औसत ६० करोडले यसलाई दैनिक प्रयोग गर्ने पछिल्ला आँकडाले देखाएका छन् ।
अमेरिका, क्यानडा, अस्ट्रेलियाजस्ता देशमा विभिन्न अड्चनको सामना गर्नुपरे पनि टिकटक अत्यन्तै लोकप्रिय रहेको छ । पछिल्लो तथ्याङ्क अनुसार अमेरिकामा मात्रै सो भिडियो स्ट्रिमिङ एपका १० करोडमाथि, क्यानडामा क्यानडामा ३ करोड र अस्ट्रेलियामा अढाइ करोड प्रयोगकर्ता छन् । आईटी सुरक्षा कम्पनी क्लाउडफेयरको एक सर्भेअनुसार सन् २०२१ मा टिकटकले प्रख्यात सर्च इन्जिन गुगलको भन्दा बढी भिजिटर पाउन सफल भएको थियो ।
