प्रधानमन्त्री पुष्पकमल दाहाल चार दिने भारत भ्रमणका लागि प्रस्थान गरेका छन् । आज अपराह्न प्रधानमन्त्री दाहाल सहितको टोलि भारतको राजधानी नयाँदिल्ली प्रस्थान गरेको हो ।
प्रधानमन्त्री नेपाल एयरलाइन्सको नियमित उडानबाट दिल्ली प्रस्थान गरेका हुन् । उनीसँगै भ्रमणमा सरकारी अधिकारी ४७ जना , निजी उद्योग व्यवसाय क्षेत्रका ४१ जना, मिडियाका प्रतिनिधि , ५ मन्त्री, डेढ दर्जन सचिव तथा सहसचिव सहभागी भएका छन् ।
प्रधानमन्त्री दाहालले भारतीय समकक्षी मोदीसँग बिहीबार दिल्लीस्थित हैदराबाद हाउसमा भेटवार्ता गर्दै छन् । दुई नेताबीच एक्लाएक्लै र प्रतिनिधिमण्डलस्तरको समेत वार्ताको तयारी छ । लगानी, व्यापार, प्रविधि विकास, विकास आयोजनाको निर्माण, अपराध अनुसन्धानमा सहकार्यलगायत विषयमा डेलिगेसन लेभलमा सहमति हुने परराष्ट्र स्रोतको भनाइ छ ।
भारतको सहुलियत ऋणमा बनेको न्यु मोदी–लेखनाथ प्रसारण लाइन, कसुहा–कटैया डबल सर्किट लाइन तथा नेपालगन्जमा बनेको एकीकृत जाँच चौकीको संयुक्त उद्घाटनको तयारी छ ।
त्रिभुवन विमानस्थलमा प्रधानमन्त्री प्रचण्डलाई सभामुख देवराज घिमिरे, राष्ट्रिय सभाका अध्यक्ष गणेशप्रसाद तिमिल्सिनालगायत मन्त्रीहरूले बिदाइ गरेका थिए । सरकारको नेतृत्वमा फर्किएको पाँच महिनापछि प्रधानमन्त्री दाहाल भारत भ्रमणमा गएका हुन ।
गत पुस १० मा तेस्रो पटक प्रधानमन्त्री बनेपछि दाहालको यो पहिलो विदेश भ्रमण हो । भ्रमणटोलि २० गते शनिवार स्वदेश फर्कने कार्यसूची छ ।
