सरकारले पेट्रोल, डिजल र मट्टीतेल आयातमा लगाउँदै आएको भन्सार महसुल र पूर्वाधार विकास करमा ५० प्रतिशत छुट दिने निर्णय गरेको छ । आज बसेको मन्त्रिपरिषद् बैठकले पेट्रोलियम पदार्थमा भन्सार महसुल र पूर्वाधार विकास करमा छुट दिने निर्णय गरेको हो ।
पेट्रोलियम पदार्थ आयात गर्दा सरकारले भन्सार महसुल, हरित कर, पूर्वाधार विकास कर, सडक मर्मत दस्तुर मूल्य अभिवृद्धि कर (भ्याट) लगाउँदै आएको छ ।
अहिले १ लिटर पेट्रोल आयात गर्दा २५ रुपैयाँ २३ पैसा भन्सार महसुल, १० रुपैयाँ पूर्वाधार विकास कर, १३ प्रतिशत भ्याट, ४ रुपैयाँ सडक मर्मत दस्तुर र १ रुपैयाँ हरित कर लाग्दै आएको छ । यस्तै अहिले डिजेल आयात गर्दा प्रतिलिटर १२ रुपैयाँ ३ पैसा महसुल, १० रुपैयाँ पूर्वाधार विकास कर, १३ प्रतिशत भ्याट, २ रुपैयाँ सडक मर्मत दस्तुर र १ रुपैयाँ हरित कर लाग्छ ।
इन्धनको खपत घटाउन र आपूर्ति सहज बनाउन सरकारले आमनागरिकलाई विद्युतीय सवारी साधनको प्रयोग बढाउन र सम्भव भएसम्म घरबाटै कार्य सम्पादन (वर्क फ्रम होम) गर्न आह्वान गरेको छ । अवस्था जटिल बनेमा सवारी साधनमा जोर-बिजोर प्रणाली समेत लागू गर्न सकिने संघीय मामिला तथा सामान्य प्रशासनमन्त्री प्रतिभा रावलले जानकारी दिइन् ।
