काठमाडौंलो त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा जारी काभा महिला भलिबल च्याम्पियनसिप २०२६ अन्तर्गत सेमिफाइनल समीकरण पूरा भएको छ ।
सोमबार भएको दिनको तेस्रो तथा समूह चरणको अन्तिम खेलमा अन्तिम खेलमा इरानले कजाखस्तानलाई ३-० को सोझो सेटमा हराएपछि सेमिफाइनलमा घरेलु टोली नेपाल सँगको भेट तय भएको हो । समूह ‘बी’ को शीर्ष स्थानका लागि निर्णायक मानिएको खेलमा इरानले कजाखस्तानलाई २५-२२, २५-२० र २५-२२ को सेटमा पराजित गर्दै अपराजित यात्रालाई कायम राख्यो ।
तीनै खेल जितेको इरानले ९ अंकसहित समूह विजेताको रूपमा अन्तिम चारमा स्थान बनायो भने दुई जित र एक हार बोकेको कजाखस्तान ६ अंकसहित उपविजेता बन्यो । यसअघि दिनको दोस्रो खेलमा समूह ‘ए’को भारतले किर्गिस्तान लाई सोझो सेटमा पराजित गर्दै शीर्ष स्थान सुरक्षित गरेको थियो । भारत समूह विजेता बनेपछि नेपाल उपविजेताको रूपमा सेमिफाइनल प्रवेश गरेको हो । अब दोस्रो सेमिफाइनलमा भारत र कजाखस्तान आमनेसामने हुनेछन् ।
नेपाल र इरानबीचको भिडन्तले भने विगतको प्रतिस्पर्धालाई फेरि स्मरण गराउने भएको छ । सन् २०२४ मा काठमाडौंमै सम्पन्न काभा महिला च्यालेन्ज कपमा यी दुई टोलीबीच दुई पटक भेट भएको थियो ।
लिग चरणमा नेपाल इरानसँग पराजित भएको थियो भने सेमिफाइनलमा उत्कृष्ट पुनरागमन गर्दै इरानलाई हराएर फाइनल यात्रा तय गरेको थियो । गत वर्ष उज्वेकिस्तानमा भएको प्रतियोगिताको पहिलो संस्करणमा इरानले उपाधि जितेको थियो । प्रतियोगिताका दुवै सेमिफाइनल खेल जेठ १४ गते हुनेछन् ।
