बैतडीमा जन्ती बोकेको बस दुर्घटना हुँदा मृत्यु हुनेको संख्या १३ पुगेको छ । पुर्चौडी नगरपालिका-७ को भौनीबाट बेहुली लिएर फर्किंदै गरेको जन्ती बस बढ्गाउँ मोडमा दुर्घटना भएको हो ।
जिल्ला प्रहरी कार्यालय बैतडीका अनुसार सुप प्र ०२ ००१ ख १११९ नम्बरको बस सडकबाट करिब दुई सय मिटर तल खसेको हो । प्रहरी र स्थानीयवासीको सहयोगमा घाइतेहरूको उद्धार गरिएको छ ।
दुर्घटनामा परेर हालसम्म १३ जनाको मृत्यु पुष्टि भएको छ । मृतकहरूमा बझाङको बित्थडचिर गाउँपालिका-७ का ४० वर्षीय केशव राज जोशी, १३ वर्षीय अशोक राज जोशी, ३५ वर्षीय बसन्त जोशी, ४१ वर्षीय विष्णुदत्त जोशी र ४२ वर्षीय नरेश राज जोशी छन् । त्यस्तै, बझाङकै केदारस्यु गाउँपालिकाका ६० वर्षीय मोहन देव भट्ट, जयपृथ्वी गाउँपालिका-७ का ४० वर्षीय बसन्त राज रतला र बैतडीको पुर्चौडी नगरपालिका-७ की पुष्पा अवस्थीको पनि मृत्यु भएको प्रहरीले जनाएको छ ।
दुर्घटनामा परेर ४५ जना घाइते भएका छन् । केहीको अवस्था गम्भीर रहेको प्रहरीले जनाएको छ । उकालो सडकमा अत्यधिक भारका कारण बस दुर्घटनामा परेको हुनसक्ने प्रहरीको प्रारम्भिक अनुमान छ ।
