सरकारले भोलि मंगलबार राष्ट्रिय शोकको घोषणा गरेको छ । आज अपराह्न बसेको मन्त्रिपरिषद्को आकस्मिक बैठकले इजरायलमा मृत्यु भएका १० जना नेपालीको शोकमा मङ्गलबार राष्ट्रिय शोकको निर्णय गरेको हो । सरकारका प्रवक्ता एवं सञ्चारमन्त्री रेखा शर्माका अनुसार दिवंगत भएका नेपालीहरुप्रति सम्मान गर्दै राष्ट्रिय शोक घोषणा गरी देशभरका सरकारी कार्यालय र विदेशस्थित नेपाली नियोगहरुमा राष्ट्रिय झन्डा आधा झुकाउने निर्णय भएको छ ।
मन्त्री शर्माले हमासको आक्रमणमा परी ज्यान गुमाएकाको परिवारलाई १० \ १० लाख राहत दिने निर्णय पनि बैठकले गरेको जानकारी दिईन ।
इजरायलको कृषी क्षेत्रमा लर्न एण्ड अर्न कार्यक्रम अन्तर्गत इन्टर्नमा गएकामध्ये १० विद्यार्थीको बिद्रोही समुह हमासको आक्रमणमा मृत्यु भएको थियो । केही घाइते छन् । बंकरमा रहेका अरु ३२ जना विद्यार्थीलाई सुरक्षित स्थानमा ल्याईएको छ ।
