नवौं शेरबहादुर खड्का स्मृति राष्ट्रिय महिला भलिबल प्रतियोगिताको उपाधि टिप टप न्यु डायमण्ड युथ स्पोर्टस क्लबले जितेको छ ।
न्यू डायमण्डले एक साताअघि भएको एनभिए च्याम्पियनसिपको फाइनलमा पनि पुलिसलाई हराउँदै उपाधि जितेको थियो । दुवै प्रतियोगितामा अपराजित रहँदै न्यू डायमण्ड च्याम्पियन बनेको हो ।
आज त्रिपुरेश्वरस्थित राष्ट्रिय खेलकुद परिषद (राखेप)को कभर्डहल सम्पन्न फाइनलमा साविक विजेता नेपाल पुलिस क्लबलाई ३-१ ले हराउँदै न्यू डायमण्ड च्याम्पियन बनेको हो । फाइनलमा न्यु डायमण्डले पहिलो, दोश्रो र चौथो सेट क्रमशः २५-२३, २५-१८ र २७-२५ ले जित हासिल गरेको हो । तेश्रो सेट भने २५-१५ ले गुमाएको थियो ।
विजेता डायमण्डले उपाधिसहित ५ लाख रुपैयाँ प्राप्त गरेको छ । उपविजेता पुलिसले २ लाख ५० हजार प्राप्त गर्यो । प्रतियोगितामा सशस्त्र प्रहरीको एपिएफ क्लब तेस्रो र त्रिभुवन आर्मी क्लब चौथो भएको छ । आर्मीलाई ३-० को सोझो सेटमा हराउँदै एपिएफ तेस्रो भएको हो । दुवै टोलीले क्रमशः १ लाख २५ हजार र ६२ हजार ५ सय रुपैयाँ प्राप्त गरेको छ ।
विधागत पुरस्कारमा पनि न्यू डायमण्डकै बर्चस्व रहेको छ । न्यु डायमण्डकी प्रतिभा माली सर्वोत्कृष्ट खेलाडी बनेकी छन् । यो उपाधिसहित उनले ५० हजार रुपैयाँ प्राप्त गरिन् । न्यु डायमण्डकी सुमित्रा रेग्मी बेस्ट बल्कर र बेस्ट सेटरको उपाधि न्यु डायमण्ड प्रगति नाथले जितिन् । यस्तै न्यु डायमण्डका कुमार उत्कृष्ट प्रशिक्षक बने ।
एपिएफकी मिना सुनुवार बेस्ट स्पाइकर तथा नेपाल पुलिसकी शान्ति कला तामाङ बेस्ट लिबेरो र पुलिसकी पुनम चन्द बेस्ट सर्भर बनिन् । उत्कृष्ट बन्न सफल खेलाडी र प्रशिक्षकले समान २५ हजार रुपैयाँ प्राप्त गरे ।
