नेपाली कांग्रेसको १५औं महाधिवेशन वैशाखको अन्तिममा हुने भएको छ । आज केन्द्रीय कार्यसम्पादन समितिको बैठकमा बहुमतले यस्तो प्रस्ताव पारित गरेको हो । उक्त प्रस्तावसहित कांग्रेसले केन्द्रीय समितिसहित तल्ला तहका सबै समितिको म्याद सोही मितिसम्म थप गर्ने निर्णय गरेको हो ।
यो निर्णयमा कांग्रेसका महामन्त्रीद्वय गगन थापा र विश्वप्रकाश शर्मासहित अर्जननरसिंह केसी, फरमुल्लाह मन्सुर र उमा रेग्मीले विमति राखेका थिए । कार्यसम्पादन समितिले पारित गरेको कार्यतालिकाअनुसार महाधिवेशनको नयाँ मिति वैशाखको २८ देखि ३१ सम्म हुनेछ ।
यसअघि पुस अन्तिममा महाधिवेशन गर्ने कार्यतालिका कांग्रेसले पारित गरेको थियो । त्यसका लागि कांग्रेसले गाउँ नगर वडा अधिवेशन-२०८२ चैत २१ गते, गाउँ नगर अधिवेशन-२०८२ चैत २५ गते गर्ने निर्णय गरेको छ । त्यसैगरी प्रदेशसभा क्षेत्रीय अधिवेशन-२०८२ चैत २८ गते, एकमात्र प्रतिनिधि सभा क्षेत्रीय अधिवेशन-२०८३ वैशाख २ गते, दुई वा दुईभन्दा बढी निर्वाचन क्षेत्रको क्षेत्रीय अधिवेशन-२०८३ वैशाख ५ गते गर्ने निर्णय भएको कांग्रेस प्रवक्ता डा. प्रकाशशरण महतले जानकारी दिए । उनका अनुसार प्रदेश अधिवेशन-२०८३ वैशाख १०, ११ र १२ गते र केन्द्रीय महाधिवेशन-२०८३ वैशाख २८, २९, ३० र ३१ गते गर्ने निर्णय भएको छ ।
कांग्रेस प्रवक्ता डा. प्रकाशशरण महतले विशेष महाधिवेशनको औचित्य मंसिर १५ बाटै समाप्त भइसकेको बताएका छन् । केन्द्रीय कार्यसम्पादन समितिको बैठकले महाधिवेशनको कार्यतालिका हेरफेर गरेपछि सञ्चारकर्मीहरूसँग कुरा गर्दै अहिले पार्टी १५औं महाधिवेशनमा प्रवेश गरिसकेको बताए । चुनावको कारणले यसअघिको कार्यतालिका प्रभावित भएको कारणले केही समय पर धकेलेको मात्रै उनले बताए । उनले बैठकमा केही नेताहरूले फरक मत राखेको पनि बताए ।
तर, महामन्त्री थापाले कार्यवाहक सभापति पूर्णबहादुर खड्काले पार्टीको महाधिवेशन आगामी वैशाखमा सार्न र जेठसम्म केन्द्रीय समितिको म्याद थप्न प्रस्ताव गरेको बताए । साथै आफूहरूको फरक मत हुँदाहुँदै बैठकबाट बहुमतले उक्त प्रस्ताव पारित भएको बताए ।
उनले महाधिवेशन वैशाखमा गर्ने भनिए पनि पुसमा विशेष महाधिवेशन हुने बताएका छन् । विधानले विशेष महाधिवेशन गर्नुको विकल्प नदिएको भन्दै थापाले गर्नैपर्ने बताए । थापाले अन्य कुरामा लागू भएको विधान विशेष महाधिवेशनको हकमा नलाग्ने भन्ने नहुने बताए । आज केन्द्रीय समितिले पुसभित्र महाधिवेशन नगर्ने निर्णय गरे पनि विशेष महाधिवेशन नगर्ने प्रस्ताव नआएको थापाको भनाई छ ।
विधानले अब विधान महाधिवेशन गर्नुको विकल्प नदिएको भन्दै थापाले केन्द्रको जिम्मेवार नेताहरूले विधानको पालना नगरे आफूहरूले टुलुटुलु हेरेर नबस्ने बताए । विधानले दिएको अधिकार प्रयोग गरी पुसभित्र विशेष अधिवेशन आयोजना गर्ने उनको भनाई छ । उनले पुसको मसान्तमा काठमाडौंमा विशेष महाधिवेशनमा आउने तयारी गर्न पनि आग्रह गरेका छन् ।
