नेपाल श्रीलंकाको कोलम्बोमा जारी काभा महिला यु-१९ भलिबल च्याम्पियनसिपको फाइनलमा प्रवेश गरेको छ ।
आज भएको दोश्रो सेमिफाइनल खेलमा माल्दिभ्सलाई ३-० ले हराउँदै नेपाल उपाधिनजिक पुगेको हो । एकतर्फी जित निकाल्ने क्रममा नेपाल २५-११,२५-३ र २५-५ ले विजयी भएको छ ।
नेपालले आइतवार हुने फाइनलमा उपाधिका लागि कीर्गिस्तानको सामना गर्नेछ । पहिलो सेमिफाइनलमा आयोजक श्रीलंकालाई ३-० ले हराउँदै कीर्गिस्तान उपाधि नजिक पुगेको हो । कीर्गिस्तान २६-२४,२५-२१ र २५-१५ ले विजयी भएको थियो ।
च्याम्पियनसिपमा सहभागी ४ टोलीमा नेपाल समूह चरणको पहिलो खेलमा कीर्गिस्तानसँग ३-२ ले पराजित भएको थियो । कीर्गिस्तान २२-२५,२५-१४,१८-२५,२५-२२ र १५-९ विजयी भएको थियो ।
बिहीबार नेपालले माल्दिभ्सविरुद्ध ३-० सेटको जित निकालेको थियो । नेपालले खेल २५-७, २५-१० र २५-११ ले आफ्नो पक्षमा पारेको थियो । नेपालले हिजो श्रीलंकालाई ३-१ ले हराएको थियो । नेपालले २५-१८,२६-२४,१९-२५,२५-२० विजयी भएको थियो ।
भोलि फाइनल र तेस्रो स्थानको खेल हुनेछ । नेपालले गत वर्ष काभा महिला यू-२० मा कास्य पदक जितेको थियो ।
