बंगलादेशमा भएको सेन्ट्रल एसिया भलिबल संघ (काभा) कप पुरुष भलिबल प्रतियोगितामा नेपालले पाँचौं स्थान हासिल गरेको छ ।
ढाकाको मिरपुरस्थित शहिद सुह्रवर्दी इन्डोर रंगशाला आज बिहान पाँचौ स्थानको लागि भएको प्लेअफ खेलमा नेपालले माल्दिभ्सलाई ३-१ को सेटमा पराजित गर्यो । नेपालले सुरुआती दुई सेट २९-२७, २५-२० ले आफ्नो पक्षमा पारेको थियो । प्रतिस्पर्धात्मक तेस्रो सेट भने नेपालले ३५-३७ ले गुमायो । चौथो सेटमा नेपाल २५-१९ ले विजयी भयो ।
माल्दिभ्स ६ टोली सहभागी प्रतियोगितामा अन्तिम भएको छ । प्रतियोगितामा नेपालले माल्दिभ्सलाई दोस्रो पटक हराएको हो । लिग चरणमा पनि नेपालले माल्दिभ्सलाई ३-० को सोझो सेटमा पराजित गरेको थियो । लिग चरणमा नेपालले तुर्किमिनिस्तान, अफगानिस्तान र श्रीलंकासँग समान ३-० तथा बंगलादेशसँग ३-२ सेटको हार बेहोरेको थियो ।
प्रतियोगिताको उपाधि भने तुर्किमिनिस्तानले जितेको छ । आजै भएको निर्णायक खेलको पहिलो र तेश्रो सेट अफगानिस्तानले २५-२० र २५-१८ ले आफ्नो पक्षमा पारेको थियो । दोश्रो र चौथो सेट भने तुर्किमिनिस्तानले २५-२१ र २५-२० ले जित्यो । अन्तिम सेट १५-१२ ले जित्दै तुर्किमिनिस्तान च्याम्पियन बनेको हो । प्रतिस्पर्धात्मक खेलमा पराजित भएपछि अफगानिस्तान दोश्रो स्थानमा चित्त बुझाउन बाध्य भयो ।
त्यस्तै, बंगलादेशलाई २५-२०, २५-२३ र २५-२० ले पराजित गर्दै श्रीलंकाले तेश्रो स्थान हासिल गरेको छ । पराजित बंगलादेश चौथो भएको छ ।
