लगातारको हिमपातका कारण मनाङको उपल्लो भेगमा फसेका करिब एक हजार ५ सय पर्यटकको सुरक्षाकर्मीको टोलीले उद्धार गरेका छन् । नेपाली सेनाका प्रवक्ता राजाराम बस्नेतका अनुसार मनाङस्थित नयाँ भैरवीदल गुल्मबाट खटिएको टोलीले पर्यटकहरुको उद्धार गरेको हो ।
मनाङको तिलिचो, खाङसार, पिसाङ, माथिल्लो मनाङ तथा हुम्दे इलाकाका विभिन्न स्थानमा फसेका २०० विदेशी पर्यटकसहित एक हजार ५०० जनाको उद्धार गरिएको हो । उद्धार टोलीले स्थानीय प्रशासन, जनप्रतिनिधि, सशस्त्र प्रहरी बल नेपाल, नेपाल प्रहरीको सहकार्यमा पर्यटकहरूलाई सुरक्षित स्थानसम्म पुर्याएको थियो ।
मुस्ताङको ‘हिडन भ्याली’मा अलपत्र परेका तीन बेलायती महिला सहित १२ स्वदेशी पर्यटकको उद्धारको प्रयास भइरहेको प्रवक्ता बस्नेतले बताए । उनले ‘हिडन भ्याली’मा अलपत्र परेका तीन बेलायती महिलासहित १२ स्वदेशी पर्यटकको हवाई उद्धारको प्रयास भइरहेको जानकारी दिँदै लगातार हिउँ परिरहेको र मौसम खराब भएका कारण केही समस्या भएको बताए ।
म्याग्दीदेखि धवलागिरि हिमाल फन्को लगाएर मुस्ताङ जाने धवलागिरि चक्रीय पदमार्गको हिडन भ्यालीमा पुगेका पर्यटक समस्यामा परेका थिए । म्याग्दीको धवलागिरि गाउँपालिका-४, मुदीको इटाली आधार शिविर भएर मुस्ताङको घरपझोङ गाउँपालिका-२, मार्फा जाने क्रममा सोमबार रातिदेखि भएको निरन्तर हिमपातले पदमार्ग पुरिएपछि ती पर्यटक हिडन भ्यालीमा रोकिएको बताइएको छ ।
यसैबीच, मुस्ताङ भ्रमणमा पुगेका आन्तरिक पर्यटक अविरल हिमपातबाट प्रभावित बनेपछि उनीहरूको स्वास्थ्योपचारका लागि सशस्त्र प्रहरी बलको टोली खटिएको छ । आज बिहानैदेखि सशस्त्रको टोलीले मुक्तिनाथ मन्दिर प्रवेशद्वारमा स्वास्थ्य शिविर सञ्चालन गरी करिब दुई सय ५० जनाको स्वास्थ्य परीक्षण र औषधी वितरण गरेको सशस्त्र प्रहरी बलका सहप्रवक्ता शैलेन्द्र थापाले जानकारी दिए ।
स्वास्थ्य शिविरमा सशस्त्र प्रहरी बल, नेपाल नं ३३ गुल्मको टोली खटिएको थियो । त्यस क्षेत्रमा हिमपात भएको र एक्कासी चिसो बढेका कारण धैरै पर्यटकमा टाउको दुख्ने, वाकवाकी लाग्ने तथा श्वासप्रश्वासमा समस्या देखिएको छ । उनीहरूको समस्या पहिचान गरी सामान्य प्राथमिक उपचारसमेत गरिएको सशस्त्र प्रहरीले जनाएको छ ।
सशस्त्र प्रहरीले मुक्तिनाथ मन्दिर जाने बाटो र मन्दिर परिसरको हिउँ पन्छाएर पर्यटकलाई सहजीकरण गरेको छ । हिउँ पन्छाउनका लागि आज बिहानैदेखि सशस्त्र प्रहरीको टोली परिचालित भएका छन् । बाटोमा जमेको हिउँ पन्छाएपछि मुक्तिनाथ दर्शनमा सहजता भएको जनाइएको छ ।
जल तथा मौसम विज्ञान विभागले उच्च हिमाली क्षेत्रमा वर्षा र हिमपातसम्बन्धी पूर्व सूचनाका कारण मुस्ताङ प्रवेश गर्ने पर्यटक तथा तीर्थयात्रीको संख्या घट्न थालेको छ । स्वदेशी पर्यटकले खचाखच भरिएका मुस्ताङमा प्रतिकुल मौसमको सूचनासँगै पोखरा-बेनी हुँदै मुस्ताङमा प्रवेश गर्नेभन्दा फर्किने संख्या बढेको हो ।
जिल्ला प्रहरी कार्यालयको घाँसा चेकपोस्टको तथ्यांकमा कात्तिक १२ गते मंगलबार सडक सञ्जालबाट ४ हजार २ सय ३१ जना र मनाङ जिल्ला हुँदै थोरङला पासबाट १ सय ४९ जना गरी ४३ सय ८० जना मुस्ताङ प्रवेश गरेका छन् । सो सडकमार्ग हुँदै ४ हजार ९ सय ८५ जना पर्यटक बाहिरिएका छन् । कुल सवारी साधन ६ सय ९७ प्रवेश गरेकोमा घाँसाबाट ७ सय ४७ बाहिरिएकोमा उपल्लो मुस्ताङमा ११ सवारी साधन प्रवेश गरी १ सय ५५ बाहिरिएका छन् ।
