सहकारी ठगी आरोपमा पुर्पक्षका लागि कारागारमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई नख्खु कारागार स्थानान्तरण गरिएको छ ।
भैरहवा विमानस्थलबाट सवा ५ बजेतिर काठमाडौंस्थित त्रिभुवन विमानस्थलमा ल्याइएका उनलाई आयल निगमको बाटोबाट नख्खु पुर्याइएको थियो । विमानस्थलमा उनका केही समर्थक भेला भएका थिए । उनीहरू पर्खेर बसेको बाटोभन्दा फरक बाटो प्रयोग गरेर लामिछानेलाई विमानस्थलबाट नख्खु कारागारतिर लगिएको थियो ।
ललितपुरको नख्खुमा रविप्रति सद्भाव दर्शाउन उनकी श्रीमती निकिता पौडेलसहित केही सांसद र समर्थक भेला भएका थिए । लामिछानेलाई कारागार परिसरमा प्रवेश गराइएपछि रास्वपा कार्यकर्ताले नाराबाजी गरेका थिए ।
गत २५ चैतदेखि लामिछाने भैरहवा कारागारमा थिए । उनकै मागअनुसार नख्खु कारागार सारिएको हो । उनी अहिले बुटवलको सुप्रिम सहकारीको बचत रकम ठगी गरेको मुद्दाका अभियुक्त हुन् । उनीविरुद्ध अरु चार वटा जिल्लामा सोही प्रकृतिको मुद्दा चलिरहेको छ ।
