फिफा विश्वकप कतार २०२२ अन्तर्गत समूह बी बाट इंग्ल्यान्ड समूह विजेता बन्दै नकआउट चरणमा प्रवेश गरेको छ ।
मंगलबार अहमद बिन अली रंगशालामा वेल्सलाई ३-० ले हराउँदै इंग्ल्यान्ड समूहको शीर्ष स्थानमा रह्यो ।
इंग्ल्यान्डका लागि वेल्सविरुद्ध मार्कस रासफर्डले २ र फिल फोडेनले १ गोेल गरे । दुवै खेलाडी यसै खेलमा सुरुवाती रोजाइमा अटाएका थिए । पहिलो हाफमा गोल निस्कन नसकेपनि इंग्ल्यान्डले दोस्रो हाफको सुरुवातमै दुई गोल गर्दै खेलमा पकड बनाएको थियो ।
खेलको ५० अौं मिनेटमा रासफर्डले फ्रिकिकमा सिधै गोल गरेका थिए । उनले २५ यार्ड टाढाबाट प्रहार गरेको फ्रिकिक गोलरक्षक ड्यानी वार्डले बचाउन सकेनन् । अघिल्लो खेलमा पहिलो रोजाइका वायन हेनेसीले रातो कार्ड खाएपछि वार्डले खेल सुरुवात गरेका थिए ।
सुरुवाती अग्रता लिएको दुई मिनेटपछि नै इंग्ल्यान्डले दोस्रो गोल थप्यो । ह्यारी केनले दायाँ विंगबाट दिएको लो क्रसमा अनमार्क रहेका फिल फोडेनले फार पोस्टबाट गोल गर्दै स्कोर २-० बनाए ।
६८ अौं मिनेटमा राफर्डले व्यक्तिगत दोस्रो गोल गरे । काल्भिन फिलिप्सको लामो पासलाई पेनाल्टी क्षेत्रभित्र लग्दै उनले गोल गरे । दुई डिफेन्डरको बीचबाट उनले गरेको प्रहार गोलरक्षक वार्डलाई लाग्दै गोल भएको थियो ।
प्रि–क्वार्टरफाइनलमा समूह ‘ए’को उपविजेता सेनेगलसँग भेट निश्चित गरेको इङ्ल्यान्डले पहिलो खेलमा इरानलाई ६–२ को नतिजामा पराजित गरेको थियो। दोस्रो खेलमा अमेरिकासँग बराबरी र तेस्रो खेलमा जितसहित सात अंक जोड्दै इङ्ल्यान्ड अन्तिम १६ मा पुगेको हो।
