अखिल नेपाल फुटबल महासंघ (एन्फा)ले महिला लिग छनोटको सम्पूर्ण तयारी पूरा भएको जनाएको छ । एन्फाले बुधबार पत्रकार सम्मेलन गर्दै प्रतियोगिताको तयारी पूरा भएको जनाएको हो ।
बिहीबारबाट सुरु हुने छनोट प्रतियोगितामा १४ टोलीको सहभागिता रहनेछ । सहभागी टोलीहरुलाई दुई समूहमा विभाजन गरिएको छ । समूह ‘ए’मा चर्च ब्वाइज युनाइटेड एफसी, छहारी फुटबल क्लब, राप्ती एफसी, सिन्धुपाल्चोक एफसी, स्टुडेन्ट्स फुटबल क्लब, आरएस रिसोर्ट एण्ड बिच फुटबल र एफसी रिएले तथा समूह ‘बी’मा न्युरोड टिम (एनआरटी), संकटा एफसी, बुटवल लुम्बिनी एफसी, एनबीएम पोखरा गर्ल्स एफसी, झापा एफसी, लम्की फुटबल एण्ड ट्रेनिङ सेन्टर र नेपाल खेलकुद क्लब छन् ।
यसअघि असार पहिलो साता एन्फाले महिला लिग छनोट खेल्ने १६ टिमको नाम सार्वजनिक गरेको थियो । उक्त सूचीमा रहेकामध्ये चित्लाङ एफसी र कन्काइ खेलकुद प्रतिष्ठानले समयमा कागजात नबुझाएपछि प्रतियोगिता खेल्न नपाएको हो ।
हरेक समूहमा एक अर्कासँग प्रतिस्पर्धा गरेपछि शीर्ष दुई टोली सिधै मुख्य प्रतियोगिताका लागि छनोट हुनेछन् । यसैगरी तेस्रो स्थानमा रहने टोलीबीच प्लेअफ हुनेछ । जसको विजेताले पनि महिला लिग खेल्नेछ ।
कूल ४३ खेल हुने प्रतियोगिताका खेलहरु च्यासल रंगशाला र सातदोबाटोस्थित एन्फा मुख्यालय मैदानमा सञ्चालन हुनेछन् । उद्घाटन खेलमा छहारी फुटबल क्लब र एफसी रिएले भिड्नेछन् । यो खेल एन्फा मुख्यालय मैदानमा दिउँसो १ बजे सुरु हुनेछ । ४:१५ मा सुरु हुने दोश्रो खेलमा संकटा र नेपाल खेलकुद क्लब भिड्नेछन् ।
प्रतियोगिताको अनुमानित बजेट ८९ लाख ७३ हजार रुपैयाँ रहेको छ । एन्फाले प्रतियोगितामा सहभागी टोलीलाई ५० हजार तयारी खर्च तथा १० हजार रुपैयाँ ‘म्याच फी’का रुपमा उपलब्ध गराउनेछ ।
