जनमत पार्टीका अध्यक्ष सीके राउतले रेशम चौधरीलाई पक्राउ गरेर एकता भाँड्न खोजेको आरोप लगाएका छन् ।
रेशम चौधरी रिहाइ भएपछि सञ्चारकर्मीसँग कुरा गर्दै अध्यक्ष राउतले पक्राउको घटनालाई आफूहरुले ठूलो षड्यन्त्रको रूपमा लिएको बताए । उनले भने, ‘पार्टी एकीकरण हुने दिन नै रेशम चौधरीलाई पक्राउ गर्नुलाई हामीले ठूलो षड्यन्त्रको रूपमा लिएका छौं । हामीबीच हुने पार्टी एकता भाँड्ने प्रयास पनि हो ।’
उनले सर्वोच्च अदालतका शाखा अधिकृत महिमानसिंह विष्टलाई मोहोरा मात्र बनाइएको आरोप लगाए । ‘यस घटनामा ठूलै षड्यन्त्र भएको छ । कर्मचारीलाई त मोहोरा मात्र बनाइएको हो,’ उनले भने । अध्यक्ष राउतले पार्टी एकीकरण भएरै छाड्ने भए । त्यसका लागि आवश्यक छलफल हुने बताए । ‘उहाँ रिहा भइसक्नुभएको छ । अब हामी यस घटनालाई समीक्षा गर्छौं । पार्टी एकीकरण त भएरै छाड्छ,’ उनले भने ।
त्यस्तै रेशम चौधरीका बुबा लालवीर चौधरीले भोलि नै पार्टी एकता हुने बताए । ‘भोलि नै पार्टी एकता हुन्छ । हामी अझ बलियो भएर आउनेछौं,’ उनले भने ।
जनमत पार्टी र नागरिक उन्मुक्ति पार्टीबीच आज प्रज्ञा प्रतिष्ठानमा एकता घोषणा हुँदै थियो । त्यसै क्रममा सादा प्रहरीले रेशम चौधरीलाई पक्राउ गरेका थिए । महिमानसिंहले जारी गरेको पत्रका आधारमा प्रहरीले उनलाई पक्राउ गरेको थियो । तर, पत्र नै शंकास्पद देखिएपछि सर्वोच्च अदालतले अर्को पत्र जारी गरेर रेशमलाई थुनामुक्त गर्न निर्देशन दिएको थियो ।
नक्कली पत्र जारी गर्ने विष्ट पक्राउ परेका छन् । प्रहरी परिसर काठमाडौंले उनलाई पक्राउ गरेर अनुसन्धान गरिरहेको जनाएको छ ।
