गण्डकी प्रदेशमा आयोजित नवौं राष्ट्रिय खेलकुद प्रतियोगिताको औपचारिक उदघाटन आज कास्कीको पोखरा रंगशालामा हुँदैछ ।
सात वटा प्रदेशसहित नेपाली सेना, नेपाल प्रहरी, सशस्त्र प्रहरी, गैरआवासीय नेपाली संघ (एनआरएन) गरी कूल ११ टिमबीच प्रतिस्पर्धा हुने राष्ट्रिय खेलकुद परिषद (राखेप) ले जनाएको छ ।
उपराष्ट्रपति नन्दबहादुर पुनले आज अपरान्ह ४ पोखरा रंगशालामा प्रतियोगिता उद्घाटन गर्ने भएका छन्।
११ टोलीका ६ हजार १ सय ५७ खेलाडीले प्रतिस्पर्धा गर्ने प्रतियोगितामा विजयी खेलाडी र खेलाडीका टिमले ३९३ स्वर्ण, ३९३ रजत र ६०० काँस्य पदक हात पार्ने छन् ।
नवौं राष्ट्रिय खेलकुदमा खेलाइने कूल ३६ वटा खेलहरुमध्ये २६ वटा खेल पोखराको घरेलु मैदानमा नै हुने छन् । अन्य खेल तनहुँ, स्याङ्जा, पर्वत, गोरखा, नवलपुर, म्याग्दी र बाग्लुङ जिल्लामा हुने छन् ।
गण्डकी प्रदेशका सबै जिल्लामा राष्ट्रिय खेलकुदअन्तर्गत कम्तीमा एक खेल खेलाउने भनिए पनि पूर्वाधारलगायत कारणले लमजुङ, मनाङ र मुस्ताङमा भने यसपटक खेल नहुने भएको छ ।
