काठमाडौं । नेपाली कांग्रेसका महामन्त्री प्रदीप पौडेलले जनजीविकासँग जोडिएका मुद्दालाई प्रभावकारी रूपमा उठाउन पार्टीका नेता तथा कार्यकर्तालाई आग्रह गर्नुभएको छ ।
नेपाली कांग्रेस गण्डकी प्रदेशले पोखरामा आयोजना गरेको बधाई तथा शुभकामना कार्यक्रममा महामन्त्री पौडेलले सरकारले जनजीविकाका सवालमा गम्भीरता नदेखाएको र मूल्यवृद्धि नियन्त्रण गर्न नसकेको आरोप लगाउनुभयो । उहाँले नागरिकका दैनिक समस्यालाई कांग्रेसले प्राथमिकताका साथ उठाउनुपर्ने बताउनुभयो ।
निर्वाचन नजिकिँदै गर्दा सुशासन, संघीयताको सबलीकरण र समावेशी प्रतिनिधित्व सुनिश्चित गर्ने विषयलाई पार्टीले मुख्य एजेन्डा बनाउनुपर्ने उहाँको भनाइ थियो ।
नागरिकसँग आत्मीय सम्बन्ध कायम गर्दै उनीहरूका समस्या र पीडालाई बुझ्न तथा देश विकासका योजनामा जिम्मेवार भएर अघि बढ्न उहाँले नेता तथा कार्यकर्तालाई आग्रह गर्नुभयो ।
कार्यक्रममा कांग्रेस गण्डकी प्रदेश सभापति शुक्रराज शर्माले भ्रष्टाचार नियन्त्रण र पार्टीले विगतमा गरेका ऐतिहासिक तथा महत्वपूर्ण कामको अभिलेखीकरणमा ध्यान दिनुपर्ने बताउनुभयो ।
सो अवसरमा कांग्रेसको १५औँ महाधिवेशनबाट गण्डकी प्रदेशको प्रतिनिधित्व गर्दै केन्द्रीय सदस्यमा निर्वाचित नेताहरूलाई सम्मान गरिएको थियो ।