सरकारले १३ स्थानीय तहलाई डेंगु संक्रमणको सतर्कता अपनाउन आग्रह गरेको छ ।
इपिडिमियोलोजी तथा सरुवा रोग नियन्त्रण महाशाखाका किटजन्य रोग शाखाका प्रमुख डा. गोकर्णप्रसाद दाहालले ती १३ स्थानीय तहमा डेंगु संक्रमणको जोखिम उच्च देखिएकाले सतर्कता अपनाउन आग्रह गरिएको बताए । ‘हामीले पुसयता सबै स्थानीय तहको डेंगु संक्रमणको अवस्था अध्ययन गरिरहेका छौं,’ उनले भने, ‘अन्य स्थानीय तहमा फाट्टफुट्ट डेंगु संक्रमण देखिएका छन् । तर यी १३ स्थानीय तहमा पाँच वटासम्म संक्रमण देखिएकाले सतर्कता अपनाउन पत्राचार गरेका छौं ।’
उनका अनुसार ओखलढुंगाको सिद्धिचरण नगरपालिका, झापाको भद्रपुर नगरपालिका, विर्तामोड नगरपालिका, मेची नगरपालिका र कचनाकेवल गाउँपालिका, सुनसरीको धरान उपमहानगरपालिका म्याग्दीको वेनी नगरपालिका, चितवनको भरतपुर महानगरपालिका, रुपन्देहीको बुटवल उपमहानगरपालिका, मकवानपुरको हेटौंडा उपमहानगरपालिका, सिन्धुलीको कमलामाई नगरपालिका र ललितपुरको ललितपुर महानगरपालिका रहेका छन् ।
पानी जम्ने सफा ठाउँमा ‘एडिज एजिप्टी र एडिस एल्बोपिक्टस’ प्रजातिको लामखुट्टेले फुल पार्दछ र ती फूल लार्भा निस्कन्छ र त्यही लार्भा वयस्क भएर टोकेपछि डेंगु संक्रमण हुन्छ ।
