अमेरिकी राष्ट्रपति डोनाल्ड ट्रम्पले ‘प्रोजेक्ट फ्रिडम’ अस्थायी रूपमा स्थगित गरिएको बताएका छन् । उनले यो मिसन छोटो अवधिका लागि रोकिएको जानकारी दिएका छन् ।
राष्ट्रपति ट्रम्पले आफ्नो सामाजिक सञ्जाल प्लेटफर्म ‘ट्रुथ सोसल’मा पोस्ट गर्दै इरानसँगको सम्झौतालाई अन्तिम रूप दिन यस्तो निर्णय गर्नुपरेको बताएका हुन् । ट्रम्पले लेखेका छन्, ‘सोमबारदेखि सुरु भएको ‘प्रोजेक्ट फ्रिडम’ आपसी सहमतिमा रोकिएको छ, किनकि इरानसँगको सम्झौतामा ठूलो प्रगति भएको छ ।’
ट्रम्पले होर्मुज जलमार्ग क्षेत्रमा फसेका वा रोकिएका जहाजहरूलाई अमेरिकी सेनाको सुरक्षामा बाहिर निकाल्ने उद्देश्यसहित ‘प्रोजेक्ट फ्रिडम’ योजना सोमबार घोषणा गरेका थिए । तर, इरानी सरकारी सञ्चारमाध्यमहरूले भने यो स्थगनलाई विश्वव्यापी ढुवानीका लागि महत्वपूर्ण मानिने होर्मुज जलमार्ग पुनः सञ्चालनमा ल्याउने प्रयासमा अमेरिकाको निरन्तर असफलतापछि ट्रम्प पछि हट्न बाध्य भएको संकेतका रूपमा व्याख्या गरेका छन् ।
मिसन रोकिए पनि ट्रम्पले इरानी बन्दरगाहहरूमा लगाइएको अमेरिकी नौसैनिक नाकाबन्दी भने जारी रहने स्पष्ट पारेका छन् । अमेरिकी राष्ट्रपतिको यो घोषणा विदेशमन्त्री मार्को रुबियोले इरानविरुद्ध गरिएको प्रारम्भिक अमेरिकी-इजरायली सैन्य अभियान ‘अपरेसन एपिक फ्युरी’ले आफ्नो उद्देश्य पूरा गरिसकेको बताएपछि जनाइएको छ । रुबियोले मंगलबार पत्रकारहरूसँग भनेका थिए, ‘हामी शान्तिको मार्गलाई प्राथमिकता दिन्छौं । राष्ट्रपतिले सम्झौता चाहनुभएको छ ।’
यससँगै विश्व बजारमा कच्चा तेलको मूल्यमा लगातार दोस्रो दिन पनि गिरावट आएको छ । मध्यपूर्वी क्षेत्रबाट तेलको आपूर्ति पुनः सुचारु हुने अपेक्षाका बिच बुधबार तेलको मूल्य ओरालो लागेको हो । बुधबार जुलाईका लागि ब्रेन्ट क्रुडको मूल्य प्रतिब्यारेल १.५२ डलर अर्थात् १.३८ प्रतिशतले घटेर १०८.३५ डलर कायम भएको छ ।
अघिल्लो कारोबार सत्रमा यसको मूल्यमा ४ प्रतिशतको गिरावट आएको थियो । त्यस्तै, अमेरिकी बेन्चमार्क वेस्ट टेक्सस इन्टरमिडिएट (डब्लूटीआई)को जुन महिनाको मूल्य पनि १.५० डलर अर्थात् १.४७ प्रतिशतले घटेर प्रतिब्यारेल १००.७७ डलरमा झरेको छ, जुन अघिल्लो दिन ३.९ प्रतिशतले घटेर बन्द भएको थियो ।
