निजी क्षेत्रको छाता संगठन नेपाल उद्योग वाणिज्य महासंघ (एफएनसीसीआई) को नयाँ नेतृत्वका लागि आज मतदान हुँदैछ । महासंघको विधानअनुसार वर्तमान वरिष्ठ उपाध्यक्ष अञ्जन श्रेष्ठ आगामी कार्यकालका लागि स्वतः अध्यक्ष बन्ने भएपछि बाँकी पदहरूका लागि निर्वाचन हुन लागेको हो ।
यस पटकको निर्वाचनमा विशेष गरी दुई समूहबीच प्यानलगत प्रतिस्पर्धा देखिएको छ । वरिष्ठ उपाध्यक्ष अञ्जन श्रेष्ठ समर्थित समूह र वर्तमान उपाध्यक्ष हेमराज ढकाल नेतृत्वको समूहले उपाध्यक्ष तथा कार्यकारिणी सदस्य पदका लागि आफ्ना उम्मेदवारहरू चुनावी मैदानमा उतारेका छन् ।
निर्वाचन समितिले दिएको जानकारी अनुसार महासंघको कुल ७३ पदका लागि १३७ जना व्यवसायीहरूले उम्मेदवारी दिएका छन् । मतदानका लागि काठमाडौँको कमलादीस्थित प्रज्ञा भवनमा बिहान ८ बजेदेखि साँझ ४ बजेसम्मको समय निर्धारण गरिएको छ ।
मतदान प्रक्रिया सम्पन्न भएलगत्तै आजै मतगणना सुरु गरिने निर्वाचन समितिले जनाएको छ । यस निर्वाचनले महासंघको आगामी कार्यसमिति र निजी क्षेत्रको नेतृत्व गर्ने नयाँ पदाधिकारीहरूको टुङ्गो लगाउनेछ ।
