प्रधानमन्त्री कप महिला टी–२० राष्ट्रिय प्रतियोगिताको उपाधि एपीएफ क्लबले जितेको छ । कीर्तिपुरस्थित त्रिभुवन विश्वविद्यालयको क्रिकेट मैदानमा भएको फाइनलमा कोशी प्रदेशलाई ११ रनले हराउँदै एपीएफ च्याम्पियन बनेको हो ।
जितको लागि एक सय १५ रनको लक्ष्य पछ्याएको कोशी प्रदेश निर्धारित २० ओभरमा चार विकेटको क्षतिमा एक सय तीन रनमा समेटिएको थियो । कोशीका लागि कप्तान रुविना क्षेत्रीले ६२ र काजल श्रेष्ठले २२ रन बनाए । अरु खेलाडीले दोहोरो अङ्कमा रन बनाउन सकेनन् ।
यसअघि टस जितेर पहिले ब्याटिङ गरेको एपीएफले निर्धारित २० ओभरमा सात विकेट गुमाउँदै एक सय १४ रन बनाएको थियो । एपीएफका लागि इन्दु बर्माले अर्धशतकीय पारी खेल्दै ५३ रनको योगदान गरिन । ज्योति पाण्डेले २७ तथा रोमा थापाले १४ रन बनाए ।
उपाधिसँगै एपीएफले पाँच लाख र उपपिवजेता कोशीले तीन लाख रुपैयाँ प्राप्त गरेको छ ।
नेपाल क्रिकेट सङ्घ (क्यान) ले पहिलो पटक महिला क्रिकेट राउन्ड रोविन लिगका आधारमा प्रतियोगिता सञ्चालन गरेको हो । पुस ५ देखि सुरु प्रतियोगितामा एपीएफ र सात प्रदेश गरी आठ टोलीको सहभागिता थियो ।
यसैबिच, नेपाली महिला क्रिकेटकी कप्तान तथा कोशी प्रदेशकी कप्तान रुबिना क्षेत्री प्रतियोगिताको सवोत्कृष्ट खेलाडी भएकी छन् । फाइनलमा एपीएफ क्लबसँग पराजित भए पनि कोशीका लागि सर्वाधिक ६२ रन बनाएकी रुबिनाले उपाधिसहित यमाहाको स्कुटर पुरस्कार प्राप्त गरिन् ।
