प्रधानमन्त्री कप पुरुष राष्ट्रिय क्रिकेट प्रतियोगिताअन्तर्गत काठमाडौंमा हुने निर्धारण भएका खेलहरू सकिएका छन् ।
माथिल्लो र तल्लो मूलपानी क्रिकेट मैदानमा सञ्चालन हुने निर्धारण भएका १५ खेलहरू आज सकिएका हुन् । बाँकी खेलहरु मधेस प्रदेशका जनकपुर र वीरगञ्जमा हुनेछन् ।
आज तल्लो मुलपानी मैदानमा भएको खेलमा गण्डकी प्रदेशले प्रधानमन्त्री कप पुरुष राष्ट्रिय क्रिकेट प्रतियोगिताको इतिहासमा पहिलोपटक विभागीय टोलीमाथि ऐतिहासिक जित हासिल गरेको छ । गण्डकीले एपिएफ क्लबलाई ४३ रनले पराजित गरेको हो । वर्षाका कारण ढिला सुरु भएको खेलमा प्रत्येक टोलीले समान २१ ओभर पाएका थिए ।
गण्डकीले दिएको १ सय ५१ रनको लक्ष्य पछ्याएको एपिएफ १८ दशमलब ३ ओभरमा १ सय ७ रनमा अल आउट भयो । त्यसअघि टस जितेर पहिले ब्याटिङ गरेको गण्डकी प्रदेश २१ ओभरमा ७ विकेट गुमाएर १ सय ५० रन बनाएको थियो ।
माथिल्लो मूलपानी क्रिकेट मैदानमा आजै सम्पन्न अर्को खेलमा विभागीय टोली त्रिभुवन आर्मी क्लबले बागमती प्रदेशमाथि रोमाञ्चक जित हासिल गर्दै प्रतियोगितामा अपराजित यात्रा कायम राखेको छ । वर्षा कारण २८ ओभरमा छोट्याइएको खेलमा आर्मीले बागमतीलाई ३ विकेटले पराजित गरेको हो ।
बागमतीले दिएको २ सय ९ रनको लक्ष्य आर्मीले इनिङको अन्तिम बल बाँकी रहँदा ७ विकेट गुमाएर पूरा गर्यो । त्यसअघि आर्मीले टस जितेर बलिङ रोजेपछि पहिले ब्याटिङ गरेको बागमतीले निर्धारित २८ ओभरमा २ सय ८ रनको योगफल तयार गरेको थियो ।
आज पहिलो जित हात पारेको गण्डकीको चौथो खेलबाट ३ अंक भएको छ । पराजित एपिएफको समान खेलबाट ३ अंक नै रहेको छ । ४ खेलमा ७ अंकका साथ आर्मी शीर्ष स्थानमा उक्लिएको छ । पराजित बागमती समान खेलमा २ अंकका साथ पुछारबाट तेस्रो स्थानमा छ ।
भोलि जनकपुरमा मधेस र कर्णाली तथा वीरगञ्जमा लुम्बिनी र सुदूरपश्चिम प्रदेशबीच खेल हुने तालिका रहेको छ ।
