अमेरिकाले भेनेजुएलाका विभिन्न स्थानमा भीषण आक्रमण गरेको छ । अमेरिकी अधिकारीहरूले सञ्चारमाध्यमलाई दिएको जानकारीअनुसार भेनेजुएलाका सैन्य अखडाहरूलाई निशाना बनाएर यो आक्रमण गरिएको हो ।
शनिबार बिहानैदेखि भेनेजुएलाको राजधानी काराकासमा ठुला विष्फोटका आवाजहरू सुनिएका छन् भने आकाशमा विमानहरू उडेको देखिएको छ । प्रत्यक्षदर्शीका अनुसार सहरको मध्यभागमा रहेको ‘ला कार्लोटा’ सैन्य एयरफिल्ड र मुख्य सैन्य आधार शिविर ‘फुएर्टे ट्युना’मा आक्रमणको प्रभाव देखिएको छ ।
यी दुवै स्थानमा विस्फोट भएको भिडियोहरू सार्वजनिक भएका छन् । आक्रमणलगत्तै वरपरका बस्तीहरूमा विद्युत् सेवा अवरुद्ध भएको छ । सहरका विभिन्न स्थानमा एकैसाथ विस्फोटको आवाज सुनिएको र राजधानी सहरमाथि धुवाँको मुस्लो देखिएको अन्तर्राष्ट्रिय सञ्चारमाध्यमले जनाएका छन् ।
यो घटना ट्रम्प प्रशासनले भेनेजुएलाका राष्ट्रपति निकोलस मदुरोमाथि केही हप्तादेखि लगातार दबाब सिर्जना गरेपछि भएको हो । अमेरिकी राष्ट्रपति ट्रम्पले आफ्ना भेनेजुएली समकक्षी मदुरोमाथि लागुऔषध तस्करी र अपराधमार्फत अमेरिकामा घुसपैठ गरेको आरोप लगाउँदै आएका छन् । अमेरिकाले क्यारेबियन क्षेत्रमा लागुऔषध बोकेको शङ्कामा डुङ्गाहरूमाथि सैन्य कारबाही तीव्र पारिरहेको समयमा यो आक्रमण भएको हो । अमेरिकाले राष्ट्रपति निकोलस मदुरो अवैधानिक रूपमा निर्वाचित भएको र उनी व्यक्तिगत रूपमै लागुऔषध तस्करीमा संलग्न रहेको दाबी गरेको छ ।
यता भेनेजुएला सरकारले भने वासिङ्टनका पछिल्ला कदमहरू राष्ट्रपति मदुरोलाई सत्ताबाट हटाउन र भेनेजुएलाको तेल भण्डारमाथि नियन्त्रण जमाउन केन्द्रित रहेको बताएको छ । प्रतिबन्धित तेल ट्याङ्करहरू जफत गर्नु पनि अमेरिकाको सोही योजनाको हिस्सा भएको भेनेजुएलाको भनाइ छ ।
अमेरिकी हमलापछि भेनेजुएलामा संकटकाल लागू गरिएको छ । राष्ट्रपति निकोलस मादुरोले राष्ट्रिय संकटकाल घोषणा गरेका हुन् । भेनेजुएला सरकारले आधिकारिक विज्ञप्ति जारी गर्दै आफ्नो भूभागमा अमेरिकाले गम्भीर सैन्य आक्रमण गरेको भन्दै त्यसको कडा शब्दमा निन्दा र भत्सर्ना गरेको छ ।
राष्ट्रपति मादुरोले ‘बाह्य अशान्ति’को अवस्थालाई मध्यनजर गर्दै राज्यको विशेष आदेशमा हस्ताक्षर गरी तत्काल लागू गर्न निर्देशन दिएका छन् । भेनेजुएलाले अन्तर्राष्ट्रिय समुदायसमक्ष अमेरिकाको यस कदमलाई ‘अत्यन्त गम्भीर सैन्य आक्रामकता’ को संज्ञा दिँदै यसले राष्ट्रको राजनीतिक स्वतन्त्रतालाई जबरजस्ती तोड्न खोजेको आरोप लगाएको छ । राष्ट्रपतिले उपयुक्त समय र परिस्थितिमा सबै राष्ट्रिय रक्षा योजनाहरू कार्यान्वयन गर्न सेनालाई आदेश समेत दिएका छन् ।
यसैबीच, अमेरिकी राष्ट्रपति डोनाल्ड ट्रम्पले भेनेजुएलामाथि ठूलो स्तरको सैन्य हमला गरिएको र त्यहाँका राष्ट्रपति मादुरोलाई पक्राउ गरिएको दाबी गरेका छन् । सामाजिक सञ्जाल ‘ट्रुथ सोसल’मा एक सन्देश लेख्दै ट्रम्पले अमेरिकी सुरक्षा निकायको सहयोगमा गरिएको विशेष अपरेशनका क्रममा मादुरो र उनकी पत्नीलाई पक्राउ गरी देश बाहिर लगिएको उल्लेख गरेका छन् । यसबारे थप जानकारी दिन उनले फ्लोरिडास्थित मार ए लागोमा पत्रकार सम्मेलन गर्ने समेत बताएका छन् ।
