काठमाडौंको ठमेलस्थित छायाँ सेन्टरमा अवस्थित अलफ्ट होटलको वाल्डो क्यासिनो अवैध ढंगले विस्तार गर्ने तयारी गरेको छ । हाल पनि क्यासिनो नियमावली २०८२ विपरीत अन्डरग्राउन्डमा क्यासिनो चलाइरहेको अलफ्टले माथिल्लो तलामा पनि क्यासिनो विस्तार गर्न लागेको हो ।
काठमाडौं महानगरपालिकाले १० हजार वर्गफिटभन्दा बढी क्षेत्रमा भवन संरचना निर्माण गर्दा अन्डरग्राउन्ड पार्किङ अनिवार्य गरेको छ । तर, अलफ्टले अन्डरग्राउन्डमा पार्किङसहित क्यासिनो चलाएको छ । पार्किङस्थलमा अन्य व्यावसायिक गतिविधि गरेको पाइए महानगरपालिकाले भत्काउँदै आएको छ ।
त्यस्तै क्यासिनो नियमावलीअनुसार एउटा पाँचतारे होटल वा रिसोर्टमा एउटा मात्र क्यासिनो, एउटामात्र प्रवेशद्वार र बहिर्गमनका लागि एउटामात्र ढोका हुनुपर्छ । अलफ्टले अन्डरग्राउन्डसहित छायाँ कम्प्लेक्सको पहिलो तलामा पनि क्यासिनो विस्तार गर्न लागेको छ । दुईवटा तलामा क्यासिनो चलाउनासाथ दुईवटै प्रवेशद्वार र बहिर्गमनका लागि दुईवटा ढोका बनाउनुपर्ने हुन्छ, जुन नियमावलीमा उल्लिखित मापदण्डविपरीत हुनेछ ।
नियमावलीको नियम ६ को उपनियम १८ अनुसार खेलाडी तथा क्यासिनोसँग सम्बन्धित कर्मचारी क्यासिनो स्थलमा प्रवेश गर्न र बाहिर निस्किनका लागि छुट्टाछुट्टै मार्ग वा ढोकाको व्यवस्था हुनुपर्छ ।
१५ तला रहेको छायाँ कम्प्लेक्सको पाँचौं तलादेखि माथि २०७६ सालदेखि पाँचतारे अलफ्ट होटल सञ्चालनमा छ । होटलमा १६० कोठा छन् । अनुमानित लागत साढे ५ अर्ब रहेको छायाँ सेन्टरको चौथो तलासम्म भने २३० वटा पसल युनिट छन् । दुई तला अन्डरग्राउन्ड रहेको कम्प्लेक्सको एउटा अन्डरग्राउन्डमा करिब ३ सयवटा गाडी अट्ने पार्किङ बनाइएको छ भने अर्को अन्डरग्राउन्डमा हाल वालडोर नामबाट क्यासिनो चलाइएको छ ।
वालडोरमा चिनियाँ नागरिकको बहुमत सेयर छ । अहिले म्यानमारमा रहेका चिनियाँ स्क्यामरहरुलाई माथिल्लो तला लिजमा दिएर वालडो नामबाटै क्यासिनो चलाउन लागिएको हो । माथिल्लो तलामा क्यासिनोका लागि अनुमति पाएका चिनियाँ स्क्यामरहरु म्यानमारमा कारबाहीमा परेपछि नेपाललाई लगानीको अर्को गन्तव्य बनाउन लागेका हुन् । यसले पनि एउटै होटलमा दुईवटा क्यासिनो चलाउन लागेको स्पष्ट हुन्छ ।
क्यासिनो सञ्चालन गर्दा सरकारलाई हरेक वर्ष ८ करोड रुपैयाँ रोयल्टी बुझाउनुपर्छ । तर, अलफ्टमा एउटा नामबाट दुईवटा क्यासिनो चलाएर रोयल्टी छली गर्ने योजना बनाइएको भन्दै आलोचना सुरु भएको छ । क्यासिनो नियमावलीको नियम ५ (ङ) अनुसार एउटै होटल वा रिसोर्ट परिसरमा एकभन्दा बढी क्यासिनो सञ्चालन गर्न पाइँदैन । यसले हरेक वर्ष सरकारलाई रोयल्टी बापतको ८ करोड घाटा हुने देखिन्छ ।
पर्यटन विभागका निर्देशक एवं सूचना अधिकारी लिलाधर अवस्थीले एउटा होटल परिसरमा एउटा क्यासिनो खोल्न सक्ने व्यवस्थाअनुसार नै माथिल्लो तलामा विस्तार गर्न लागिएको हुनसक्ने बताए । उनले भने, ‘नियमावली अलि स्पष्ट छैन,’ उनले भने, ‘दुईवटा तलामा चलाउन नपाइने भन्ने उल्लेख छैन ।’ तर, दुई वटा क्यासिनो चलाउन भने कानुनले बन्देज लगाएको उनले बताए । ‘सेयर स्वामित्व थपघट गरेर चलाउन लागिएको भए त्यसमा विभागले हस्तक्षेप गर्न सक्दैन,’ निर्देशक अवस्थीले भने ।
ठमेलको करिब १५ रोपनी क्षेत्रफलमा फैलिएको व्यापारी कम्प्लेक्स छायाँ सेन्टरमा रहेको यो पाँचतारे होटल स्टारउडको अलफ्ट ब्रान्डमा सञ्चालन भएको हो ।
