बंगलादेशमा आयोजना हुने काभा पुरुष नेसन्स लिग भलिबलको लागि नेपाली टोलीको घोषणा भएको छ । काभा पुरुष नेसन्स लिग कात्तिक ५ देखि ११ गते (अक्टोर २२-२८) सम्म बंगलादेशको ढाकामा हुँदैछ ।
नेपाल भलिबल संघले शनिवार १४ सदस्यीय अन्तिम टोली घोषणा गरेको जनाएको छ । प्रारम्भिक चरणमा छनोट भएका १८ खेलाडीले असोज पहिलो सातादेखि प्रशिक्षण सुरु गरेका थिए । त्यसबाट अन्तिम टोली छनोट गरिएको हो । पुरुष टिमको मुख्य प्रशिक्षकमा भरत यादव र सहायक प्रशिक्षकमा उत्सव खड्का छन् ।
नेपाल भलिबल संघको असोज २३ गते सम्पन्न ५७ औं कार्यसम्पादन समितिको बैठकअनुसार राष्ट्रियका प्रशिक्षकहरुलाई राष्ट्रिय टिम छनोटको जिम्मेवारी दिइएको र असोज २३ र २४ गते भएको अन्तिम चरणको छनोटबाट १४ सदस्यीय टिम छनोट गरेको नेपाल भलिबल संघले विज्ञप्ति जारी गर्दै जानकारी दिएको छ ।
पुरुष टोलीमा अधिकांश नयाँ अनुहारहरु छन् । यसअघि राष्ट्रिय टिमबाट खेलिसकेका जम्मा ६ खेलाडी मात्र टिममा छन् भने ८ नयाँ खेलाडी पहिलो पटक सिनियर राष्ट्रिय टोलीमा परेका छन् । भलिबल संघले कप्तान भने तोकेको छैन ।
