अमेरिकाले १९ देशका नागरिकले पाएको ग्रीनकार्ड पुनरवलोकन गर्ने भएको छ । राष्ट्रपति डोनाल्ड ट्रम्पको निर्देशनमा सुरक्षाको दृष्टिले संवेदनशील मानिएका १९ देशका सबै नागरिकलाई दिइएको ग्रीन कार्ड पुनः कडाइका साथ जाँच गर्न लागिएको हो ।
बुधबार राजधानी वाशिङ्टन डिसीमा नेशनल गार्डका सुरक्षाकर्मीहरूमाथि गोली चलेपछि ट्रम्पले कडाइका साथ ग्रीन कार्ड पुनरवलोकन गर्न निर्देशन दिएका थिए । यो घटनामा सन् २०२१ मा अमेरिका छिरेका अफगानी नागरिकको संलग्नता रहेको बताइएको छ ।
अमेरिकी नागरिकता तथा अध्यागमन सेवा (युएससीआईएस)का निर्देशक जो एड्लोले राष्ट्रपति ट्रम्पको निर्देशनअनुसार सम्बन्धित देशका सबै विदेशी नागरिकका ग्रीन कार्ड पूर्ण रूपमा पुनः परीक्षण गर्न आदेश दिइएको बताएका छन् । यूएससीआईएसले जुन महिनामा जारी गरिएको राष्ट्रपतिको घोषणामा सूचीकृत १९ देशलाई ‘सुरक्षाका दृष्टिले संवेदनशील देश’का रूपमा उल्लेख गरिएको जनाएको छ ।
ग्रीन कार्ड जाँच हुने देशहरूमा अफगानिस्तान, म्यानमार (बर्मा), चाड, कंगो गणतन्त्र, इक्वेटोरियल गुएना, एरिट्रिया, हैटी, इरान, लिबिया, सोमालिया, सुडान, यमन, बुरुण्डी, क्युबा, लाओस, सिएरा लियोन, टोगो, तुर्कमेनिस्तान र भेनेजुएला रहेको सीएनएनले जनाइएको छ ।
वासिङ्टनको गोलीकाण्डमा संलग्न आरोपी रहमान उल्लाह लाकानवाल एक अफगान नागरिक भएको पहिचान सार्वजनिक भएपछि प्रशासनले आप्रवासन नियन्त्रण थप कडा बनाएको हो ।
