नेपाल प्रहरीका नवनियुक्त प्रहरी महानिरीक्षक (आईजीपी) चन्द्रकुबेर खापुङलाई दर्ज्यानी चिह्न प्रदान गरिएको छ । बिहीबार गृहमन्त्रालयमा आयोजित एक समारोहबीच गृहसचिव गोकर्णमणि दुवाडीले खापुङलाई आईजीपीको दर्ज्यानी चिह्न लगाइदिएका हुन् ।
यही भदौ १३ गते बसेको मन्त्रिपरिषद् बैठकले खापुङलाई नेपाल प्रहरीको ३२औँ महानिरीक्षक नियुक्त गर्ने निर्णय गरेको थियो । दर्ज्यानी चिह्न सुशोभन कार्यक्रममा नवनियुक्त आईजीपी खापुङले देश र संगठनका लागि आफू समर्पित हुने बताए । उनले सकेको राम्रो गर्ने, तर नराम्रो नगर्ने उल्लेख गरे ।
प्रहरीमा रहेर संगठनको हित विपरीतको कार्य गर्नेलाई दबाब र प्रभावमा संरक्षण नभइ कारबाहीको दायरमा ल्याएर अन्यलाई सबक सिकाउन सके संगठनको मान कायम रहने उनको भनाइ छ । खापुङ २०५२ कात्तिक ७ मा प्रहरी निरीक्षकबाट सेवा प्रवेश गरेका थिए ।
