उज्वेकिस्तानमा जारी एएफसी महिला च्याम्पियन्स लिगमा सशस्त्र प्रहरीको एपीएफ फुटबल क्लबले लतागार दोस्रो हार व्यहोरेको छ । थाइल्याण्डको कलेज अफ एसियन स्कोलर्सले आज एपीएफलाई ४-० ले हरायो ।
स्कोलर्सको जितमा सबै गोल कानियानात क्षतबुक्तरले गरिन् । लगातारको दोस्रो हारमा एपीएफ समूह चरणबाट बाहिरिएको छ । उज्वेकिस्तानको कार्सी स्टेडियममा भएको खेलमा एपिएफकी रश्मिकुमारी घिसिङले पाएको दुई उत्कृष्ट मौकालाई सदुपयोग गर्न सकिनन् ।
खेलको ३३औं मिनेटमा कलेज अफ एसियन स्कोलर्सले अग्रता बनायो । क्लोज रेन्जबाट कानियानातले गोल गरिन् । पहिलो हाफको इन्ज्युरी समयमा कानियानातले अग्रता दोब्बर गरिन् । ५५औं मिनेटमा कानियानातले ह्याट्रिक पूरा गरिन् । गीता रानाले क्लियर गर्न नसकेको बलमा किपर एन्जिलासँगको वान भर्सेज वानमा कानियानातले सहजै गोल गरिन् । खेलको ६३औं मिनेटमा तामोवान रक्षाफाप्दीको क्रसमा किपर एन्जिलाले रोके पनि रिबाउन्डमा कानियानातले गोल गरिन् ।
नेपालको लिग विजेता एपीएफले दोस्रो हाफमा पनि सुधारिएको प्रदर्शन गर्न सकेन । २ खेलमा एपीएफले ७ गोल खाँदा गोल गर्न सकेको छैन । यसअघि पहिलो खेलमा एपीएफ घरेलु टोली एफसी नासाफसँग ३-० ले हारेको थियो । एपीएफले यो छनोट दोस्रो पटक खेलेको हो । अहिलेसम्म गोल गर्न भने सकेको छैन ।
अब समूह चरणको आफ्नो अन्तिम खेल एपिएफले आइतबार साउदी अरेबियाको अल नासारसँग खेल्नेछ । समूहको विजेता अर्कत्त चरणमा पुग्नेछ ।
