नेपालगञ्जमा अत्यधिक गर्मीका कारण बालबालिका बिरामी पर्न थालेका छन् । भेरी अस्पतालका बालरोग विशेषज्ञ डाक्टर प्रतिमा खड्का हमालका अनुसार मौसमी रुघाखोकी र भाइरल फ्लुबाट बालबालिका प्रभावित बनेका छन् । उनले अस्पतालको ‘ओपीडी’ मा दैनिक ५० भन्दाबढि बिरामी बालबालिका उपचारका लागि आउने गरेको बताइन् । अस्पताल आएका मध्ये चारदेखि पाँच बिरामी बालबालिका भर्ना हुने गरेका छन् ।
बालबालिकामा ज्वरो, रुघाखोकी, झाडापखाला, पेट दुख्ने समस्या देखिएको छ ।
गर्मीको समयमा हुने मौसमी रुघाखोकी र भाइरल फ्लुबाट जोगिन बालबालिकालाई अनिवार्य माक्सको प्रयोग गर्नुपर्ने, खाना खानुभन्दा अघि राम्री साबुनपानीले हात धोएर मात्र खाना खान चिकित्सकको सुझाव छ ।
मौसमी फ्लूबाट प्रभावित भएका बालबालिकालाई निको हुन सामान्यता चारदेखि पाँच दिन लाग्ने डाक्टर हमालले बताइन । अत्यधिक गर्मीका कारण बढेको मौसमी फ्लुबाट जोगिन घरकै खाना खाने, पानी धेरै पिउने, सफा खाने कुरा मात्र खाने, घाममा नबस्ने र धेरै हिँडडुल नगर्ने सुझाब दिइन् ।
खासगरी तीनदेखि आठ वर्षसम्मका बालबालिका बिरामी भई आउने गरेको अस्पतालले जनाएको छ । गर्मी बढेपछि २३ गतेसम्म बन्द गरिएका विद्यालयहरु शुक्रबारसम्मलाई बिदा दिइएको छ । मौसम विज्ञान विभाग नेपालगञ्ज बाँकेका अनुसार नेपालगञ्जको तापक्रम ४० डिग्रीसम्म पुग्ने गरेको छ ।
