काठमाडौंको मनोहरामा वर्षौंदेखि जग्गा कब्जा गरेर बसेका सुकुम्वासीलाई हटाउन पुगेको नेपाल प्रहरी र महानगर प्रहरीमाथि ढुंगामुढा भएको छ ।
काठमाडौं महानगरपालिका नगर प्रहरीले शुक्रबार बिहानैदेखि डोजर चलाएर २५ वटा टहरा भत्काइएपछि स्थिति केहीबेर तनावग्रस्त बनेको थियो । अधिकार सम्पन्न बागमती सभ्यता एकीकृत विकास समिति र महानगरपालिकाले सुकुम्वासी बस्ती हटाउन डोजरसहित महानगर प्रहरी पुगेपछि सुकुम्वासीहरूले ढुंगामुढामा उत्रिएका हुन् ।
नगर प्रहरीमाथि ढुंगामुढा गरिएपछि नेपाल प्रहरीसमेत परिचालन गरिएको थियो । प्रहरीले रोक्न खोज्दा सुकुम्वासीहरू प्रहरीमाथि जाइलागेका हुन् । सुकुम्वासीको ढुंगामुढाबाट दुई जना नगर प्रहरी घाइते भएका छन् ।
सरकारी जग्गा अतिक्रमण गरी बनाइएका संरचना हटाउन खोज्दा झडपको स्थिति उत्पन्न भएको महानगर प्रहरी प्रमुख राजु पाण्डेले जानकारी दिए । उनका अनुसार सुकुम्वासीका सबै समान बाहिर निकालेर मात्रै घर टहरामा डोजर लगाइएको हो ।
