रूसको पूर्वी क्षेत्र कामचाट्का प्रायद्वीपमा बुधबार बिहान ८.८ म्याग्निच्युडको शक्तिशाली भूकम्प आएको छ । अमेरकी भूगर्भीय सर्वेक्षणका अनुसार यो भूकम्प इतिहासकै छैटौं सबैभन्दा ठूलो हो ।
अमेरिकी भूगर्भीय सर्वेक्षण (युएसजीएस)का अनुसार नेपाली समयअनुसार भूकम्प बिहान ४:५४ बजे आएको हो । जसको केन्द्र सतहदेखि १९.३ किलोमिटर गहिराइमा थियो । भूकम्पपछि कामचाट्कामा चार मिटरसम्मको सुनामी आएको छ, जसका कारण धेरै भवनहरूमा क्षति पुगेको छ । अहिले जापानको होक्काइडो, कानागावा, वाकायामा लगायतका क्षेत्रमा सर्वाधिक असर देखिएको छ । सुनामीका कारण फेरी सेवा र हवाइ यातायातमा बाधा पुगेको छ ।
भूकम्पपछि आएको सुनामीका कारण जापानमा पनि असर परेको छ । जापानी प्रसारण संस्था एनएचकेका अनुसार देशको पूर्वी तटमा १ फिट अग्ला सुनामीका लहरहरू पुगेका छन् । जापान सरकारले लगभग २० लाख मानिसलाई सुरक्षित स्थानमा सार्न आदेश दिएको छ । फुकुशिमा परमाणु रिएक्टर पनि खाली गराइएको छ ।
अमेरिकाको हवाईस्थित हनाली खाडीमा पानीको सतह एक्कासि घट्न थालेको छ, जुन सुनामी आउनुअघि देखिने संकेत हो । इक्वाडोर र रूसको तटीय इलाकामा ३ मिटर (१० फिट) सम्म अग्ला लहरको चेतावनी जारी गरिएको छ । पेरु, इक्वाडोर र चीनकाका तटीय क्षेत्रहरूमा पनि सतर्कता जारी गरिएको छ । अष्ट्रेलिया, मेक्सिको, न्यूजील्याण्ड, टोङ्गा, ताइवान लगायतका देशहरूमा १ मिटर अग्ला लहरहरू आउने सम्भावना छ ।
यसअघि सन् २०१० मा चिलीमा र सन् १९०६ मा इक्वाडोरमा ८.८ म्याग्निच्युडका भूकम्प आएका थिए । चिलीको भूकम्पमा ५२३ जनाको ज्यान गएको थियो । इक्वाडोरको भूकम्पले १५०० जनाको ज्यान लिएको थियो । कामचाट्कामै सन् १९५२ मा ९ म्याग्निच्युडको भूकम्प आएको थियो, जसलाई इतिहासकै पहिलो ९ म्याग्निच्यूडको भूकम्पका रूपमा लिइन्छ । त्यो भूकम्पले विशाल सुनामी ल्याउँदै हवाईमा ठूलो क्षति पुर्याएको थियो ।
