उपेन्द्र यादव नेतृत्वको जनता समाजवादी पार्टी (जसपा) नेपालले सरकारलाई दिएको समर्थन फिर्ता लिएको छ । बुधबार बसेको संसदीय दलको बैठकले प्रधानमन्त्री केपी शर्मा ओली नेतृत्वको सरकारलाई दिएको समर्थन फिर्ता लिएको हो ।
जसपा नेपालले केपी शर्मा ओली नेतृत्वको वर्तमान सरकार पूरै असफल भएको निष्कर्ष समेत निकालेको छ । सरकार आफ्नै प्रतिबद्धताअनुसार अघि बढ्न नसकेको निचोड निकालेको हो । बैठकले सरकारको एक वर्षे कार्यकालको समीक्षा गरेको थियो । उक्त बैठकमा ११ बुँदे आरोपसहित सरकार पूरै असफल भएको निचोड निकालेको हो ।
संविधान संशोधन, सुशासन, सामाजिक न्याय र जनजीविकाका सवालमा सरकार पूरा असफल भएकाले समर्थन गरिरहनु औचित्यपूर्ण नहुने जसपाले निष्कर्ष निकालेको छ । ‘केपी शर्मा ओली नेतृत्वको असफल भइसकेको वर्तमान सरकारलाई पार्टीले गर्दै आएको समर्थनको कुनै औचित्य एवं अर्थ नै छैन । तसर्थ उक्त समर्थन फिर्ता लिई अब उप्रान्त विपक्षमा बस्ने निर्णय गरियो,’ जसपाले भनेको छ ।
११ बुँदे आरोप :
१. सुशासनको अभाव: सरकारले जनतालाई सुशासनको प्रत्याभूति दिन नसकेको ।
२. भ्रष्टाचार र अनियमितता: भ्रष्टाचार, अनियमितता, दण्डहीनता, कमिशनतन्त्र र बिचौलियाहरूको चलखेल नियन्त्रण गर्न नसकेको ।
३. आर्थिक असफलता: मुलुकको अर्थतन्त्र सुधार गर्न र आर्थिक विकासको गतिलाई अगाडि बढाउन नसकेको । साथै, आ.व. २०८२/८३ को बजेट असन्तुलित र पूर्वाग्रही ढंगले ल्याएको ।
४. संघीयता कार्यान्वयनमा निष्क्रियता: संघीयता कार्यान्वयनका लागि कुनै ठोस प्रयास नगरेको ।
५. गरिबी र बेरोजगारी: कृषि, उद्योग, पर्यटन र जलस्रोतको विकास गरी गरिबी र बेरोजगारीजस्ता समस्याहरू समाधान गर्न नसकेको ।
६. सेवा प्रवाहमा कमजोरी: स्वच्छ खानेपानी, शिक्षा, स्वास्थ्य लगायतका सेवा क्षेत्रमा गुणात्मक सुधार गरी जनतामा प्रभावकारी सेवा प्रवाह गर्न नसकेको ।
७. सामाजिक न्यायको अभाव: समानतामा आधारित न्यायपूर्ण समाज निर्माण गर्न मधेसी, आदिवासी जनजाति, दलित, महिला, पिछडावर्ग, थारू, अल्पसङ्ख्यक लगायत उत्पीडित समुदायका राष्ट्रिय समस्याहरू समाधान गर्न नसकेको ।
८. राजबन्दी रिहाइमा उदासीनता: मधेस, थरुहट, किरात-लिम्बुवान लगायतका आन्दोलनका क्रममा झूटा मुद्दा लगाई बन्दी बनाइएका राजबन्दीहरूलाई रिहा नगरेको ।
९. संविधान संशोधनमा पहलविहीनता: संविधान संशोधनका लागि हालसम्म कुनै प्रयास नगरेको ।
१०. कृषक समस्यामा बेवास्ता: कृषि विकासका लागि किसानहरूलाई कृषि बजार, सिँचाइ, मलखाद, बीउबिजन र कीटनाशक औषधिका साथै सहुलियत दरमा कृषि ऋण उपलब्ध गराउन नसकेको ।
११. रोजगारी सृजनामा असफलता: बेरोजगारी समस्या समाधान गर्न रोजगारीका अवसरहरू सृजना गर्न नसकेको ।
