ग्लोबल आइएमई बैंकले विश्व वातावरण दिवसको अवसरमा देशका विभिन्न स्थानमा वृहत् वृक्षारोपण कार्यक्रम गरेको छ । बैंकले आफ्नो १८औं वार्षिकोत्सवको अवसरमा मुलुकभर १८ हजार वृक्षारोपण गर्ने लक्ष्य राखेको थियो । बैंकले बिहीबार विश्व वातावरण दिवसको अवसरमा मुलुकका विभिन्न स्थानहरूमा वृक्षारोपण कार्यक्रम गरेको हो ।
बैंकले सुदूरपश्चिम प्रदेशको कैलालीको लम्कीचुहा नगरपालिकाको बालचौरमा सुदूरपश्चिम प्रदेशका मुख्यमन्त्री कमलबहादुर शाह र ग्लोबल आइएमई बैंकका प्रमुख कार्यकारी अधिकृत सुरेन्द्रराज रेग्मीको उपस्थितिमा एक हजार कागतीका बिरुवा रोपण गरेको छ । कार्यक्रममा जनप्रतिनिधिहरू, स्थानीय नागरिक लगायत बैंकका कर्मचारीहरूको ठुलो उपस्थिति रहेको थियो ।
त्यसैगरी, बैंकले काठमाडौंको नारायणहिटी आर्मी ब्यारेकको परिसरमा बैंकका नायब प्रमुख कार्यकारी सुमन पोखरेलको उपस्थितिमा ३ सय वटा विरुवा रोपण गरेको छ । बैंकले कोशी प्रदेशको दिक्तेल, प्रगति सामुदायिक वन, मेचीनगर, झापा लगायतका विभिन्न स्थानमा ३ हजार ७ सय वटा, मधेस प्रदेशको राजविराज, जीतपुर, लहान, गौर, मिथिला नगरपालिका (भाटिघारी सामुदायिक वन) लगायतका विभिन्न स्थानमा ५ हजार ५०, बागमती प्रदेशको नारायणहिटी आर्मी ब्यारेक, टोखा र रसुवा लगायतका विभिन्न स्थानमा २ हजार ३ सय, गण्डकी प्रदेशको बागलुङ र कास्की लगायतका विभिन्न स्थानमा २ हजार एक सय, लुम्बिनी प्रदेशको बिजुवार, घोराही, गुलेरिया, लिवाङ लगायतका विभिन्न स्थानमा १ हजार ५ सय, कर्णाली प्रदेशको विरेन्द्रनगर र रास्कोट लगायतका विभिन्न स्थानमा ७ सय र सुदूरपश्चिमको बालिया, गोकुलेश्वर, बैतडी, अत्तरिया, धनगढी, टिकापुर र महेन्द्रनगर लगायतका विभिन्न स्थानहरूमा २ हजार ८६ बिरुवा रोपण सुरु गरेको छ ।
बैंकले वृक्षारोपण कार्यक्रममा स्थानीयहरूको उत्साहजनक उपस्थिति रहेको जनाएको छ । बैंकले वृक्षारोपणको लागि विभिन्न संस्थासँग सहकार्य गरी सहरको सौन्दर्यीकरण, सामुदायिक वन, विद्यालय, अस्पताल परिसरहरू तथा सार्वजनिक स्थानहरू छनौट गरेको छ ।
