पूर्वराजा ज्ञानेन्द्र शाह पश्चिम नेपालको केही समयको भ्रमण पूरा गरी आज काठमाडौं फर्किएका छन् । उनी समिट एयरको चार्टर जहाजमार्फत काठमाडौं आएका हुन् ।
त्रिभुवन अन्तर्राष्ट्रिय विमानस्थलबाट बाहिरिने क्रममा राष्ट्रिय प्रजातन्त्र पार्टी (राप्रपा)लगायत राजनीतिक दलका नेता तथा कार्यकर्तासहित पूर्वराजा समर्थित व्यक्ति तथा सङ्घसंस्थाले उनलाई स्वागत गरेका थिए । स्वागतका लागि राप्रपा अध्यक्ष राजेन्द्र लिङदेन, राप्रपा नेपालका अध्यक्ष कमल थापा र अभियन्ता दुर्गा प्रसाईलगायत विमानस्थल पुगेका थिए । स्वागतमा सहभागी हुन राजावादीले केही दिनदेखि नै सार्वजनिक आह्वान गरेका थिए । र्याली गौशाला, चाबहिल हुँदै साँझ महाराजगञ्जस्थित निर्मल निवास पुगेको थियो । उनलाई पोखरमा पनि राजावादीहरुले पञ्चेबाजासहित बिदाइ गरेका थिए ।
प्रधानमन्त्रीविरुद्ध नाराबाजी, आदित्यनाथको तस्बिर
समर्थकले प्रधानमन्त्री केपी शर्मा ओलीविरुद्ध नाराबाजी गरेका थिए । प्रधानमन्त्रीविरुद्ध नाराबाजी गर्न थालेपछि प्रहरीसित उनीहरूको धकेलाधकेल समेत भएको थियो ।
र्यालीका सहभागीहरुले भारत उत्तर प्रदेशका मुख्यमन्त्री आदित्यनाथको तस्बिरसमेत बोकेका थिए । उनीहरुले एकातिर आदित्यनाथ र अर्कोतिर ज्ञानेन्द्र शाहको तस्बिर बोकेर र्यालीमा सहभागी भएका थिए । उक्त ब्यानरमा ‘राजसंस्था पुनर्स्थापना गरौँ’ नारा प्रयोग गरिएको थियो । आदित्यनाथको तस्बिरका विषयमा राजनीतिक दलका नेताहरूले सामाजिक सञ्जामार्फत चासो व्यक्त गरेका छन् । राप्रपाका नेताहरुले भने उक्त तस्बिरका विषयमा अनभिज्ञता प्रकट गरेका छन् ।
ट्राफिक व्यवस्थापन अस्तव्यस्त, सर्वसाधारणलाई सास्ती
राप्रपासहित पूर्वराजा समर्थित विभिन्न समूहको आह्वानमा भएको यस कार्यक्रमबाट विमानस्थल–चक्रपथ क्षेत्रको यातायात व्यवस्था प्रभावित भएको थियो । विमानस्थल क्षेत्रको संवेदनशील पक्षलाई दृष्टिगत गरी सुरक्षा व्यवस्था कडा गरिएको थियो ।
विमानस्थल प्रवेश गर्नेहरूलाई चेकजाँच गरेर मात्र भित्र जान दिइएको थियो भने मोटरसाइकल लगायतलाई प्रवेश निषेध गरिएको थियो । सबैभन्दा बढी पर्यटक र यात्रुहरूलाई सकसमा परका थिए । उनीहरु आफै सामान बोकेर गेटबाट विमानस्थलसम्म पुग्नुपरेको थियो भने विमानबाट ओर्लिएका यात्रुहरु पनि आफै सामान बोकेर गेटसम्म आउनुपरेको थियो । साँझसम्मै काठमाडौंको ट्राफिक व्यवस्थापन अस्तव्यस्त बनेको थियो ।
पूर्वराजा शाहको स्वागतमा साढे १४ हजार समर्थक सडकमा उत्रिएको प्रहरीको आँकलन छ । यसअघि करिब १० हजार मानिस र्यालीमा सहभागी हुने सरकारले अनुमान गरेको थियो ।
भिडियो वक्तव्यपछि सरागर्मी
प्रजातन्त्र दिवसको अवसरमा पूर्वराजा शाहले एक भिडियो सन्देशमार्फत अब आफू चुप नलाग्ने आसयसहित आफूलाई साथ दिन आह्वान गरेसँगै राजावादीहरुले आफ्ना गतिविधि बढाउँदै लगेका हुन् । उनले भिडियो सन्देशमा त्यागले कद बढाउने र त्यागलाई कमजोरी नठान्न भन्दै चेतावनीयुक्त भाषा प्रयोग गरेका थिए ।
राजावादीहरुले वर्तमान व्यवस्थाले देशमा सुशासन कायम हुन नसकेको, भ्रष्टाचार र बेतिथि बढेको जिकिरसहित राजतन्त्रको विकल्प नभएको बताउँदै आएका छन् ।
गणतन्त्र पक्षधर गठबन्धन बनाउन प्रस्ताव
राष्ट्रिय जनमोर्चाले देशमा प्रतिगमनको खतरा बढेको बेलामा गणतन्त्र र धर्मनिरपेक्षता पक्षधर शक्तिको कार्यगत एकता वा गठबन्धनको आवश्यकता औँल्याएको छ । पार्टी अध्यक्ष चित्रबहादुर केसीले एक विज्ञप्ति जारी गर्दै गठबन्धनका लागि जोड दिएका हुन् ।
उनले भनेका छन्, ‘राजावादीका साथै केपी शर्मा ओलीले अपनाएका प्रतिगामी नीतिका कारणले देश प्रतिगमन र अधिनायकवादतिर जाने खतरा बढेको बेलामा पनि पाँच दलीय गठबन्धन बनेको थियो । त्यो गठबन्धनका कारणले ओलीको प्रतिगमनलाई पराजित गर्नु सम्भव भएको थियो । तर प्रचण्डको अवसरवादी वा पदलोलुप क्रियाकलापका कारणले प्रतिगमनका विरुद्ध बनेको गठबन्धन टुट्न गएको छ र त्यसबाट पनि राजावादीलाई बल पुगेको छ ।’ नेपाली जनताले युगौँयुगदेखि सङ्घर्ष तथा त्याग र बलिदान गरेर प्राप्त गरेको गणतन्त्र र धर्मनिरपेक्षताको रक्षा गर्नु अहिले नेपालको राष्ट्रिय र ऐतिहासिक आवश्यकता बनेको जनमोर्चाले उल्लेख गरेको छ ।
