लुम्बिनी प्रदेश सरकारले ४५ औँ विश्व पर्यटन दिवसको अवसरमा दाङमा महोत्सवको आयोजना गर्ने भएको छ । प्रदेश उद्योग पर्यटन तथा यातायात मन्त्रालय पर्यटन विकास परिषद् र घोराही उपमहानगरपालिकाको संयुक्त आयोजनामा यही असोज ११ गते महोत्सव मनाउन लागिएको हो ।
जिल्ला समन्वय समिति घोराहीको खुल्ला मञ्चमा आयोजना गरिने कार्यक्रमको नारा ‘पर्यटन, न्याय र शान्ति’ रहेको मूल समितिका संयोजक उपमहानगरपालिकाका कार्यवाहक प्रमुख हुमाकुमारी डिसीले जानकारी दिइन् । कार्यक्रमका लागि विभिन्न नौवटा उपसमिति बनाइएको छ ।
महोत्सवमा प्रदेश अन्तर्गतका विभिन्न जिल्लाका पहिचान झल्किने लोक सांस्कृतिक झाँकी तथा नृत्य प्रस्तुत हुनेछन् ।
लुम्बिनी प्रदेशका १० प्रकारका जातीय लोक नृत्य तथा सङ्गीत, गन्दर्भ समुदायको सारङ्गी धून, थारू जातिको बड्का नाच, देउखुरीको थारू जातिको कठघोरी नाच, सखिया नाच, पाल्पाको कौडा नाच, मगरको भुम्या नाच र सरङ्गे- मयूर नाच प्रदर्शन गर्ने कार्यक्रम रहेको छ ।
उत्कृट झाँकी र नृत्यहरुलाई पुरस्कृत गरिने आयोजकले जनाएको छ ।
महोत्सवमा लुम्बिनी प्रदेशका १२ वटै जिल्लाकै सहभागिता रहनेछ । आगन्तुक पर्यटकलाई जिल्लाका पर्यटकीय क्षेत्रमा घुमाउने व्यवस्था पनि गरिएको छ ।
यहाँको पर्यटन विकास र प्रवद्र्धनमा टेवा पुर्याउने उद्देश्यले आयोजना हुन लागेको कार्यक्रमको तयारी पूरा भएको प्रचारप्रसार उपसमितिका संयोजक दुर्गालाल केसीले जानकारी दिए ।
