आहा रारा गोल्डकपको उपाधी विभागीय टोली त्रिभुवन आर्मी क्लबले जितेको छ । पाँच पटकको विजेता थ्रीस्टार क्लबलाई ३–० गोलले पराजित गर्दै आर्मीले २३ औं आहा रारा पोखरा गोल्डकपको उपाधि जितेको हो ।
आर्मीको जितका लागि जिलेप्सीजंग कार्की, फत्तेमान घले र वसन्त जिम्बाले समान एक-एक गोल गरे । खेलको ३८औं मिनेटमा आर्मीका जिलेप्सीजंगले, ८३ औं मिनेटमा आर्मीका फत्तेमान घलेले र ९४ औं मिनेटमा वसन्त जिम्बाले आर्मीका लागि गोल गरेका थिए । यसअघि ४ पटक फाइनलमा पुगेर पनि त्रिभुवन आर्मी उपाधिविहीन थियो ।
थ्रीस्टारले भने प्रतियोगितामा ६ पटक सहभागी हुँदा ५ पटक उपाधि जितिसकेको छ । आर्मीले आफ्नो हारको श्रृंखला अन्त्य गर्दै १५ औं सहभागितामा पहिलो पटक उपाधि जितेको हो ।
