सर्पले टोक्दा कपिलवस्तुमा दुई बालकसहित चार जनाको मृत्यु भएको छ । सोमबार राति बुद्धभूमि नगरपालिका १ कपासीमा दाजुभाइको सर्पले डसेर मृत्यु भएको हो । मृत्यु हुनेमा वर्ष १२ का दीपक भुसाल र वर्ष ९ का प्रदीप भुसाल छन् । दुबै जना पारिजात बोर्डिङ स्कुल गोरुसिङेमा अध्ययन गर्दै आएका थिए । हजुरआमासँगै भुइँमा ओछ्यान लगाएर सुतेका उनीहरु बिहान अचेत अवस्थामा देखिएपछि उपचारका लागि स्थानीय मेडिकलमा पुर्याइएको थियो । त्यहाँबाट उपचार सम्भव नभएपछि उनीहरुलाई थप उपचारका लागी लुम्बिनी प्रादेशिक अस्पताल बुटवल पुर्याइएको थियो ।
घरबाट पाँच किलोमिटरको दूरीमा सर्पदंश उपचार केन्द्र छ तर सर्पले डसेको शङ्का नै भएन । अरु नै केहि भएको होला भनेर उपचारका लागि बुटवल लगिएको स्थानीय पशुपति शर्माले बताए । सँगै सुतेकी हजुरआमालाई अहिले सर्पदंश उपचार केन्द्र भर्ना गरिएको छ । उनको अवस्था सामान्य रहेको भण्डारीले जानकारी दिए । मृतक बालकहरुका बुवाको केही महिना अगाडि मृत्यु भएको थियो । बुवाको मृत्युपछि आमा वैदेशिक रोजगारीमा रहेका कारण उनीहरु हजुरबुवा र हजुरआमासँगै बस्दै आएका थिए ।
यसैबीच सोमबार सर्पले डसेको थाहा नहुँदा थप दुई महिलाको मत्यु भएको सर्पदंश उपचार केन्द्रले जनाएको छ । मृत्यु हुनेमा महाराजगञ्ज नगरपालिकाका ३१ वर्षीया अनिता यादव र बुद्धभूमि नगरपालिका वडा नम्बर १० धनकौलीका वर्ष १४ की ममता चमार छन् । दुबै जनालाई गोमन सर्पले डसेको हुन सक्ने बताइएको छ । सर्पको डसाइले बिरामीमा पेट दुख्ने, थुक निल्न गारो हुने, आँखा खोल्न अप्ठ्यारो हुने, शरीर दुख्ने जस्ता लक्षण देखिने सर्पदंश उपचार केन्द्रमा जानुपर्ने भण्डारीले बताए ।
