नेपाल राष्ट्र बैंकले मोबाइल बैंकिङबाट हुने कारोबार रकमको सीमा बढाएको छ। अबदेखि सेवाग्राहीले मोबाइल एप्लिकेशन तथा क्यूआर कोड मार्फत प्रतिदिन ३ लाख रुपैयाँसम्म कारोबार गर्न पाउनेछन्।
नेपाल राष्ट्र बैंकले, ‘भुक्तानी प्रणालीसम्बन्धी एकीकृत निर्देशन, २०७९’ जारी गर्दै मोबाइल एप्लिकेशन तथा क्यूआर कोड मार्फत हुने रकम भुक्तानीको सीमा परिवर्तन गरेको हो।
निर्देशन जारी हुन अघि मोबाइल एप्लिकेशन तथा क्यूआर कोड मार्फत दैनिक २ लाख रुपैयाँसम्म कारोबार गर्न सकिन्थ्यो।
इन्टरनेट बैंकिङ मार्फत प्रतिदिन २० लाख रुपैयाँसम्म कारोबार गर्न सकिने व्यवस्था यथावत नै राखिएको छ।
त्यस्तै बैंक खाताबाट वालेटमा प्रतिदिन दुई लाख रुपैयाँसम्म लोड गर्न सकिन्छ । यता प्रति महिना लोड गर्न सकिने रकम भने १० लाख रुपैयाँ यथावत् छ ।
साथै वालेटबाट कुनै पनि बैंक खातामा प्रतिदिन दुई लाख रुपैयाँसम्म ट्रान्सफर गर्न सकिन्छ । वालेटबाट बैंक खातामा ट्रान्सफर गर्न सकिने रकम भने १० लाख रुपैयाँ यथावत् छ ।
अब प्रयोगकर्ताले एउटा वालेटबाट अर्को वालेटमा प्रतिदिन ५० हजार रुपैयासम्म पठाउन पाउनेछन् । वालेटबाट वालेटमा मासिक पाँच लाख रुपैयाँको कारोबार गर्न सकिने व्यवस्था भने यथावत् छ ।
राष्ट्र बैंकले सरकार, राजस्व व्यवस्थापन सूचना प्रणालीमा आबद्ध भएका भुक्तानी सेवा प्रदायकले सञ्चालन गरेको वालेट मार्फत गरिने राजस्व भुक्तानी सम्बन्धी कारोबारमा सम्बन्धित सेवा प्रदायकले लिने अधिकतम शुल्क पनि निर्धारण गरेको छ । जसमा ५ हजारसम्मको प्रति कारोबार अधिकतम सेवा शुल्क ५ रुपैयाँ, ५ हजार १ देखि १० हजारसम्म ८ रुपैयाँ र १० हजार १ देखि माथी १० रुपैयाँ लाग्ने छ ।
यस्तै बैंक तथा वित्तीय संस्थाका ग्राहकहरूले मोवाइल एप्लिकेशन वा इन्टरनेट बैंकिङ्गमार्फत विद्युतीय रकमान्तर गर्दा सेवा प्रदायकहरूले प्रति कारोबार अधिकतम १० रुपैयाँसम्म सेवा शुल्क लिन सक्ने व्यवस्था गरिएको छ ।
