जर्मनी फिफा विश्वकप कतार २०२२ को समूह चरणबाट बाहिरिएको छ ।
बिहीबार कोस्टारिकालाई ४–२ गोल अन्तरले हराएपनि समूह ई को निकै रोमान्चक खेलमा जर्मनी २०२२ को विश्वकपबाट बाहिरिएको हो । जर्मनी लगातार दोस्रो संस्करणमा प्रतियोगिताबाट बाहिरिएको हो ।
अल बायत स्टेडियममा खेलको १० औं मिनेटमा सेर्जी जिनाब्रीले गोल गर्दै जर्मनीलाई सुरुआती अग्रता दिलाएका थिए ।
कोस्टारिकाले ५८ औं मिनेटमा येल्त्सिन तेजेदामार्फत बराबरी गोल फर्कायो । खेलको ७० औं मिनेटमा जुआन पाब्लो भेर्गासले गोल गर्दै कोस्टारिकालाई २–१ को अग्रता दिलाए ।
काइ हार्भट्जले खेलको ७३ औं मिनेटमा गोल गर्दै जर्मनीलाई २–२ को बराबरीमा ल्याए । खेलको ८५ औं मिनेटमा हार्भट्जले व्यक्तिगत दोस्रो गोल गर्दै जर्मनीलाई ३–२ को अग्रता दिलाए ।
खेलको ८९ औं मिनेटमा निकलस फुल्करुगले गोल गर्दै जर्मनीलाई ४–२ को जित दिलाए । जित निकाले पनि जर्मनी समूह ‘ई’ मा तेस्रो स्थानमा रहेर प्रतियोगिताबाट बाहिरियो ।
स्पेन जापानसँग २-१ ले पराजित भएपछि जर्मनी बाहिरिएको हो । यस नतिजासँगै जापान ६ अंकसहित समूहको शीर्षस्थानमा रहेर नकआउट चरण प्रवेश गरेको छ । स्पेन ४ अंक जोड्दै समूहको दोस्रो स्थानमा रहेर अन्तिम १६ मा स्थान बनाउन सफल रहयो । जर्मनी ४ अंक जोडेपनि गोल अन्तरमा स्पेनभन्दा पछि रहयो । स्पेनको गोल अन्तर +६ तथा जर्मनी +१ मा रहयो । कोस्टारिका ३ अंकका साथ चौथो हुँदै बाहिरियो ।
