फ्रान्सेली मिडफिल्डर पउल पोग्वाले फिफा विश्वकप कतार २०२२ गुमाउने भएका छन् ।
सेप्टेम्बरको सुरुमा दाहिने घुँडाको शल्यक्रियापछि पोग्बा यसै महिना इटालियन क्लब युभेन्टससँगको प्रशिक्षणमा फर्किएका थिए । इंग्लिस क्लब म्यानचेस्टर युनाइटेडबाट युभेन्टस फर्किएपछि उनले खेलेका छैनन् र फेरि घाइते भएका छन् ।
पोग्बाले जुलाईमा युभेन्टसको प्रि सिजन भ्रमणको क्रममा आफ्नो मेनिस्कस च्यातिएपछि शल्यक्रिया गराएका थिए । उनी दुई साताअघि म्यानचेस्टर युनाइटेडबाट इटालियन क्लबमा पुनः सामेल भएका थिए । पोग्बा अन्तिम पटक अप्रिलमा आधिकारिक खेल खेलेका थिए ।
पाउल पोग्बा २०१८ मा फ्रान्स विश्वकप विजेता बन्दा टोलीको एक महत्वपूर्ण मिडफिल्डर थिए ।
डिफेन्डिङ च्याम्पियन फ्रान्सले नोभेम्बर २२ मा अष्ट्रेलियासँग खेल्दै विश्वकपको सुरुवात गर्नेछ । यो समूह ‘डी’ मा डेनमार्क र ट्युनिसिया पनि छ । फ्रान्सका प्रशिक्षक डिडिएर डेसच्याम्प्सले यसैसातामा आफ्नो टोली घोषणा गर्ने योजना बनाएको छ ।
२०१८ को विश्व विजेता फ्रान्स आफ्नो दुई मिडफिल्डर बिना नै कतारमा हुनेछ । चेल्सीका एन’गोलो कान्टे ह्यामस्ट्रिङ चोटको शल्यक्रियापछि बाहिर छन् ।
