नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्रको सुरक्षा सुनिश्चित गर्न आग्रह गरेका छन् । सरकारले निजी क्षेत्र प्रवर्द्धन एवं संरक्षण रणनीति पारित गरी तत्काल लागु गर्ने निर्णय गरेकोमा उनले आभार व्यक्त गरे ।
नेपाल उद्योग वाणिज्य महासंघको ६०औं साधारणसभामा अध्यक्ष ढकालले यो रणनीतिले उद्यमी र व्यवसायीहरूका लागि भौतिक सुरक्षाका साथै नीतिगत सुरक्षाको प्रत्याभूति गर्ने विश्वास गरे । महासंघकै आग्रहमा गठित उच्चस्तरीय आर्थिक सुधार आयोगको सुझावका आधारमा केही कानुनहरू खारेजीको प्रक्रियामा गइसकेको र यसले दोस्रो चरणको आर्थिक सुधारको मार्गचित्र तयार गर्ने उनले बताए ।
अध्यक्ष ढकालले महासंघको ६० वर्षको यात्रा मुलुकको आर्थिक इतिहासमा दृढ संकल्प र साझेदारीको परिणाम भएको बताए । यो संस्था निजी क्षेत्रको सशक्त आवाज र उद्योग, व्यापार एवं लगानीको वातावरण सिर्जना गर्ने अगुवाका रूपमा उभिएको उनको भनाइ छ ।
अध्यक्ष ढकालले नयाँ सरकारले महासंघको आग्रहबमोजिम ‘निजी क्षेत्र प्रवर्द्धन एवं संरक्षण रणनीति’ (पीएसपीपी) पारित गरेकोमा खुसी व्यक्त गरे । यो रणनीतिले निजी उद्यम र व्यवसायीलाई भौतिक एवं नीतिगत सुरक्षाको ग्यारेन्टी गर्ने उनले बताए । यस्तै, दोस्रो चरणको आर्थिक सुधारका लागि गठित उच्चस्तरीय आयोगका सुझावहरू कार्यान्वयन गर्ने क्रममा केही कानुन खारेज गर्ने सरकारको निर्णयलाई उनले सकारात्मक कदमका रूपमा लिए ।
मुलुकको विद्यमान आर्थिक अवस्थाबारे चर्चा गर्दै ढकालले नेपालमा अहिले राजनीतिक स्थायित्व र झण्डै दुईतिहाइको सरकार हुनु विकासका लागि अभूतपूर्व अवसर भएको बताए । छिमेकी देश भारत र चीनको ठूलो बजार र नेपालको युवा जनशक्ति (मिडियन उमेर २५ वर्ष)लाई आर्थिक प्रगतिका लागि मुख्य आधारका रूपमा प्रस्तुत गरे ।
यद्यपि, वार्षिक ७ लाख युवा वैदेशिक रोजगारीमा जानु र स्वदेशमा पर्याप्त रोजगारी सिर्जना हुन नसक्नु मुख्य चुनौती रहेको उनले बताए । सन् १९६० को दशकमा दक्षिण कोरिया र नेपालको आर्थिक अवस्था उस्तै रहे पनि अहिले कोरिया निकै अगाडि बढेको तुलना गर्दै उनले नेपालमा सोचेअनुरूप प्रगति हुन नसकेको स्वीकार गरे ।
लगानी र सुशासन स्वदेशी पुँजी परिचालन गर्न महासंघकै अग्रसरतामा १० अर्ब रुपैयाँ चुक्ता पुँजी भएको ‘नेपाल डेभलपमेन्ट पब्लिक लिमिटेड’ स्थापना भई काम सुरु भइसकेको ढकालले बताए । यसले नेपालमा केही हुँदैन भन्ने नकारात्मक भाष्यलाई चिर्न मद्दत गर्ने उनको दाबी छ । वैदेशिक लगानी (एफडीआई) भित्र्याउन सुशासन अनिवार्य सर्त भएको र त्यसका लागि प्रविधिको उच्चतम प्रयोगमार्फत नागरिक एपबाटै व्यवसाय दर्ता गर्ने व्यवस्था हुनुपर्नेमा उनले जोड दिए ।
अध्यक्ष ढकालले अब निजी क्षेत्रले आर्थिक सुधारको नेतृत्व गर्नुपर्ने र स्रोतका लागि सरकारको मुख ताक्ने प्रवृत्ति कम गर्नुपर्ने विचार राखे । “निजी क्षेत्रको सम्मान समृद्धिको आधार” भन्ने नारालाई सबैतिर विस्तार गर्नुपर्ने र व्यवसायीहरू उपभोक्ता एवं सरोकारवालाप्रति जिम्मेवार हुनुपर्ने उनले बताए । कोरोना महामारी र भूकम्प जस्ता कठिन समयमा पनि निजी क्षेत्रले धैर्यता देखाएको स्मरण गर्दै उनले आगामी दिनमा नेपालको अर्थतन्त्र थप सबल र सुधारोन्मुख हुने विश्वास व्यक्त गरे ।
