प्रत्येक वर्ष वैशाख शुक्ल पूर्णिमाका दिन किरात समुदायले मनाउने उभौली पर्व आज देशभर पूजा आराधना गरी धुमधामका साथ मनाइँदैछ । बाली लगाउनुअघि बाली राम्रोसँग सप्रियोस् भनी प्रकृतिको पूजा आराधना गरिने परम्परा रहेको छ ।
गर्मी बढ्ने भएकाले यो समुदायका मानिस बेँसीबाट लेकतिर उँभो लाग्ने भएकाले पनि यसको नाम उभौली रहेको हो । वैशाख शुक्ल पूर्णिमादेखि चराचुरुंगीलगायत जङ्गली जनावर पनि उँभो लाग्ने किरात समुदायको विश्वास छ । यस पर्वका अवसरमा सामूहिक पूजा तथा नाचगानसमेत हुनेगर्छ ।
उभौली पर्वलाई किरात समुदायका जातिहरुले ठाउँ बिशेष र आफ्नो बोल्ने भाषा अनुसार फरक-फरक नामले बोलाउने र चिन्ने गर्दछन् । यस समुदायको लिम्बूहरूले यक्वा तङनाम, राई जातिले साकेला, सुनुवारहरुले फोलष्यादर वा ष्याँदरपिदार, याक्खाहरूले युच्याङ र थामी जातिले भुम्या नामले सम्बोधन गर्ने गरेको पनि पाईन्छ ।
