बंगलादेशमा जारी सेन्ट्रल एसिया भलिबल संघ (काभा) कप पुरुष भलिबल प्रतियोगितामा नेपालले चौथो हार ब्यहोरेको छ । समूह चरणको पाँचौ खेलमा नेपाल आज श्रीलंकासँग ३-० को सोझो सेटमा पराजित भएको छ ।
आज ढाकाको मिरपुरस्थित सहिद सुह्रवर्ती इन्डोर रंगशालामा नेपालले खेल १८-२५, १७-२५ र २०-२५ ले गुमायो । यसअघि पहिलो खेलमा नेपाल तुर्किमिनिस्तानसँग २२-२५, १८-२५, २५-२७ ले पराजित भएको थियो ।
अर्को खेलमा पनि नेपाल बंगलादेशसँग ३-२ को सेटमा पराजित भयो । सुरुआती दुई सेट २३-२५, २०-२५ ले गुमाएको नेपालले त्यसपछिका दुई सेट २५-२३, २५-१६ ले आफ्नो पक्षमा पारेको थियो । पाँचौं तथा निर्णायक सेटमा भने नेपाल १४-१६ ले पछि पर्यो ।
तेश्रो खेलमा भने नेपालले सम्भावना देखाएको थियो । शुक्रबार नेपालले माल्दिभ्सविरुद्ध ३-० को सोझो सेटमा जित निकाल्दै प्रतियोगितामा पहिलो जित हासिल गरेको थियो । उक्त खेलमा नेपाल २५-२१, २५-२३, २५-१८ ले विजयी भएको थियो ।
तर, चौथो खेलको नतिजा भने नेपालका लागि दुखद हुन पुग्यो । उक्त खेलमा नेपालले १८-२५, १७-२५, २१-२५ ले अफगानिस्तानलाई नतिजा सुम्पेको थियो । योसँगै फाइनल खेल्ने नेपालको सम्भावनासमेत सकिएको थियो ।
चौथो हारसँगै पाँच खेलबाट चार अंक जोडेको नेपाल पाँचौं स्थानमा रह्यो । अब नेपालले पाँचौं स्थानको प्लेअफका लागि माल्दिभ्ससँग मंगलबार प्रतिस्पर्धा गर्नेछ ।
