वाणिज्य बैंकहरुले कात्तिक महिनाका लागि नयाँ ब्याजदर प्रकाशित गरेका छन् । प्रकाशित सूचनाअनुसार बैंकहरुको अधिकतम औषत ब्याजदर असोज महिनाको तुलनामा घटेको छ ।
भदौ महिनामा ५.४६ प्रतिशतविन्दु रहेको बैंकहरुको व्यक्तिगत मुद्दति निक्षेपको अधिकतम औषत ब्याजदर, कात्तिकमा ५.२० प्रतिशतविन्दुमा झरेको छ । यस्तो निक्षेपमा बैंकहरुको अधिकतम औषत ब्याजदर ०.२६ प्रतिशतविन्दु घटेको हो ।
हाल सञ्चालनमा रहेका २० वाणिज्य बैंकहरुमध्ये १४ बैंकहरुले ब्याजदर घटाउँदा औषत ब्याजदर घट्न पुगेको हो । ६ वाणिज्य बैंकहरुले भने व्यक्तिगत मुद्दति निक्षेपको अधिकतम ब्याजदरमा असोज महिनाकै दरलाई निरन्तरता दिएका छन् । त्यस्तै, बैंकहरुले संस्थागत मुद्दति निक्षेपको अधिकतम औषत ब्याजदर ०.२२ प्रतिशतविन्दुले घटाएका छन् ।
कात्तिक महिनाका लागि सबैभन्दा बढी ब्याजदर घटाउने बैंकमा माछापुच्छ्रे बैंक र एनएमबि बैंक रहेका छन् । यी दुई बैंकले व्यक्तिगत तथा संस्थागत मुद्दति निक्षेपको अधिकतम औषत ब्याजदर १ प्रतिशतविन्दुले घटाएका हुन् । नेपाल बैंक, सिद्धार्थ बैंक, राष्ट्रिय वाणिज्य बैंक, कुमारी बैंक, ग्लोबल आइएमई बैंक र हिमालयन बैंकले भने यी दुबै निक्षेपमा असोज महिनाकै ब्याजदरलाई निरन्तरता दिएका छन् ।
