एएफसी एसियन कप छनोटको तेस्रो चरणअन्तर्गत भियतनामविरुद्धको दुई लेगका लागि नेपाली टोलीको घोषणा भएको छ । आइतबार मुख्य प्रशिक्षक म्याट रसले अन्तिम २३ सदस्यीय टोली तयार पारेका हुन् । टोली मंगलबार भियतनाम प्रस्थान गर्ने तालिका छ ।
मुख्य प्रशिक्षक रसले गत सेप्टेम्बर २३ मा ३३ खेलाडीलाई बन्द प्रशिक्षणमा बोलाएका थिए । १२ दिनको प्रारम्भिक छनोटपछि १० खेलाडी बाहिरिएका हुन् । गत सेप्टेम्बर ६ मा नेपालले दक्षिण एसियाली प्रतिद्धन्द्धी बंगलादेशविरुद्ध अन्तर्राष्ट्रिय मैत्रीपूर्ण खेल खेलेका ६ खेलाडी अहिले समावेश छैनन् ।
बंगलादेशविरुद्ध टोलीमा रहेका अमित लामा, आदित्य शाक्य, रन्दीप पौडेल, समीर तामाङ, सृजनराज गौतम र टिकेन्द्र थापा यसपाली टोलीमा छैनन् । यीमध्ये रक्षक रन्दीप र अट्याकिङ मिडफिल्डर सृजनराज प्रारम्भिक छनोटमै बोलाइएको थिएन ।
टोलीमा गोलकिपर विशाल सुनार, रक्षकहरु विमल पाण्डे, सनिश श्रेष्ठ र सुमित श्रेष्ठ अनि अट्याकिङ मिडफिल्डरद्धय कृतिशरत्न छुन्जु र आयुष घलानले पुनरागमन जनाएका छन् । यी सबै खेलाडी एसियन कप छनोटको तेस्रो चरणअन्तर्गत लाओसविरुद्धको खेलमा टोलीमा थिए । सनिश बंगलादेशसँगको खेलका दौरान घाइते थिए । सुमित, कृतिश र आयुष भने यु-२३ एसियन कप छनोट प्रतियोगिताका लागि ताजकिस्तानमा थिए ।
समूह ‘एफ’मा रहेको नेपालले अक्टोबर ९ र १४ मा भियतनामसँग पहिलो र दोस्रो लेग खेल्ने तालिका छ । अक्टोबर १४ मा हुने दोस्रो लेग खासमा नेपालमा हुनुपर्ने थियो । तर, भौतिक पूर्वाधारहरुमा देखिएको कमजोरी र खतराका कारण दशरथ रंगशाला एएफसीबाट अयोग्य ठहर भएपछि नेपालले यो अवसर गुमाएको हो ।
पछिल्लो खेलमा नेपालले तुलनात्मक रुपमा कमजोर लाओसविरुद्ध २-१ को दूर्भाग्यजनक हार बेहोरेको थियो । त्यसअघि मलेसियाले नेपाललाई २-० ले हराएको थियो । लगातार दोस्रो हारसँगै नेपाल हाल अंकतालिकाको पुछारमा छ ।
समूहको शीर्ष स्थानमा रहने टोलीले २०२७ मा साउदी अरेबियामा हुने एसियन कपको १९औं संस्करणमा सहभिताको मौका पाउनेछ । भियतनाम विरुद्धको पहिलो लेगमा पराजय बेहोरे नेपालको एसियन कप पुग्ने चुनौती सकिनेछ ।
